आइरिस सितोरियो कराते डोजो ले विद्यालयस्तरीय जुनियर कराते बेल्ट ग्रेडिङ कार्यक्रम औपचारिक तथा सफलतापूर्वक सम्पन्न गरेको छ। विद्यार्थीहरूको शारीरिक, मानसिक तथा चारित्रिक विकासका साथै अनुशासन, आत्मविश्वास र नेतृत्व क्षमताको प्रवर्द्धन गर्ने उद्देश्यले कार्यक्रम आयोजना गरिएको हो।
कार्यक्रमका प्रमुख अतिथि सितोरियो कराते संघ बागमती प्रदेश का अध्यक्ष गगन लामा रहनुभएको थियो भने सभापतित्व विद्यालय व्यवस्थापन समिति अध्यक्ष कृष्णप्रसाद नहर्कीले गर्नुभएको थियो। साथै विभिन्न डोजो प्रमुख, राष्ट्रिय प्रशिक्षक तथा रेफ्रीहरूको सम्मानित उपस्थितिले कार्यक्रमको गरिमा थप बढाएको थियो।
जुनियर विद्यार्थीहरूले निर्धारित पाठ्यक्रमअनुसार काता र कुमितेमा आधारित अभ्यास प्रस्तुत गर्दै आफ्नो दक्षता, अनुशासन र आत्मनियन्त्रण प्रदर्शन गरेका थिए। सम्पूर्ण ग्रेडिङ प्रक्रिया व्यवस्थित, पारदर्शी र निष्पक्ष ढंगले सञ्चालन गरिएको आयोजकले जनाएको छ।
कार्यक्रमलाई सम्बोधन गर्दै प्रमुख अतिथि लामाले करातेले विद्यार्थीहरूमा सकारात्मक जीवनमूल्य, आत्मसंयम, साहस, आत्मरक्षा क्षमता र नेतृत्व गुण विकास गर्न महत्वपूर्ण भूमिका खेल्ने उल्लेख गर्नुभयो। सभापति नहर्कीले विद्यालयले शैक्षिक अध्ययनसँगै सह–पाठ्यक्रम गतिविधिलाई समान महत्व दिँदै विद्यार्थीहरूको सर्वाङ्गीण विकासमा निरन्तर जोड दिइरहेको स्पष्ट पार्नुभयो।
ग्रेडिङमा सफल भएका विद्यार्थीहरूलाई सम्बन्धित तहअनुसार नयाँ बेल्ट प्रदान गरिएको थियो। शिक्षक, अभिभावक तथा विद्यार्थीहरूको उल्लेखनीय उपस्थितिमा कार्यक्रम मर्यादित, अनुशासित र सौहार्दपूर्ण वातावरणमा सम्पन्न भएको थियो।
