चितवन। चितवनको राप्ती नगरपालिका–७, वीरेन्द्रनगरस्थित आदर्श माध्यमिक विद्यालयको चौरमा बिहीबारदेखि राप्ती खेलकुद तथा पर्यटन महोत्सव–२०८३ सुरु भएको छ। कार्तिक १३ गतेदेखि २३ गतेसम्म सञ्चालन हुने महोत्सवको उद्घाटन राप्ती नगरपालिकाका नगर प्रमुख शमशेर लामाले गर्नुभएको हो।
महोत्सवमा विभिन्न सांस्कृतिक नृत्य, मनोरञ्जनात्मक कार्यक्रम तथा राष्ट्रिय कलाकारहरूको विशेष प्रस्तुति रहने आयोजकले जनाएको छ। खेलकुद तथा सांस्कृतिक कार्यक्रममार्फत आन्तरिक पर्यटक भित्र्याउने र राप्ती नगरपालिकाको पर्यटन प्रवर्द्धन गर्ने उद्देश्यले महोत्सव आयोजना गरिएको हो।
महोत्सवको उद्घाटन समारोहमा थारू पहिरनमा सजिएका सहभागीहरूले झाँकी प्रदर्शन गरेका थिए। त्यसैगरी तेक्वान्दोका विद्यार्थीहरूको पनि सहभागिता रहेको थियो।
उद्घाटन समारोहमा बोल्दै राप्ती–७ की वडा अध्यक्ष सुमिता डल्लाकोटीले विद्यार्थीहरूको पढाइमा असर नपर्ने गरी दिउँसो ४ बजेपछि मात्रै ध्वनि बजाउन आयोजकलाई आग्रह गर्नुभयो। उहाँले महोत्सव सञ्चालन गर्दा शैक्षिक गतिविधिलाई समेत ध्यान दिनुपर्ने बताउनुभयो।
त्यस्तै, समाजसेवी घनश्याम कँडेलले स्थानीय व्यवसायीलाई स्टल उपलब्ध गराउँदै राप्ती क्षेत्रका मह तथा जडीबुटीको प्रवर्द्धन गर्न सके महोत्सवलाई थप प्रभावकारी बनाउन सकिने सुझाव दिनुभयो। स्थानीय उत्पादनको बजारीकरण र व्यवसाय प्रवर्द्धनमा महोत्सवले सहयोग पुर्याउनुपर्ने उहाँको भनाइ थियो।
राप्ती–१२ का वडा अध्यक्ष अर्जुन चेपाङले नगरपालिकाका पहाडी वडाहरूमा होमस्टे तथा होटल व्यवसायको प्रवर्द्धन गर्न सके राप्तीलाई पर्यटकीय गन्तव्यका रूपमा विकास गर्न सकिने बताउनुभयो। उहाँले पहाडी क्षेत्रको पर्यटन सम्भावनालाई उजागर गर्नुपर्नेमा जोड दिनुभयो।
नगर प्रमुख शमशेर लामाले राप्तीको बहुसांस्कृतिक तथा बहुभाषिक पहिचानलाई समेट्ने महोत्सवमा बालबालिकालाई समेत सहभागी गराउन आग्रह गर्नुभयो। उहाँले महोत्सवले स्थानीय कला, संस्कृति र विविधताको पहिचान गराउन सहयोग पुग्ने बताउनुभयो।
आयोजकका प्रतिनिधि सुदीप गिरीले खेलकुद तथा सांस्कृतिक कार्यक्रममार्फत आन्तरिक पर्यटक भित्र्याउने लक्ष्यका साथ महोत्सव आयोजना गरिएको बताउनुभयो।
उद्घाटन समारोहमा राप्ती नगरपालिकाका प्रमुख प्रशासकीय अधिकृत प्रदीप पौडेल, जनप्रतिनिधि, विभिन्न क्षेत्रका व्यवसायी, प्रशिक्षक, सशस्त्र प्रहरी तथा नेपाल प्रहरीका प्रतिनिधिलगायतको उपस्थिति रहेको थियो। कार्यक्रमको सञ्चालन पूर्णबहादुर मगरले गर्नुभएको थियो।
महोत्सव कार्तिक २३ गतेसम्म सञ्चालन हुनेछ।
