राप्ती नगरपालिका–७ वीरेन्द्रनगरस्थित साकुरा एकेडेमी स्कुलमा आज कक्षा केजीदेखि १० सम्मका विद्यार्थीहरूले बाराको सिमरामा बलात्कारपछि हत्या गरिएकी ३ वर्षीया बालिका गरिमा चौधरीको न्यायका लागि आवाज उठाएका छन्।
विद्यालय परिसरमा विद्यार्थीहरूले ‘Justice for Garima Chaudhary’ लगायतका नारा लगाउँदै गरिमा चौधरीका लागि न्यायको माग गरेका हुन्। बालिकामाथि भएको जघन्य अपराधको विरोध गर्दै दोषीलाई कडा कानुनी कारबाही गर्नुपर्ने उनीहरूको माग थियो।
सानै उमेरकी बालिकामाथि भएको अमानवीय घटनाले समाजलाई गम्भीर बनाएको भन्दै विद्यार्थीहरूले न्यायका लागि ऐक्यबद्धता जनाएका हुन्। कार्यक्रममा विद्यार्थीहरूले गरिमा चौधरीको आत्माको चिरशान्तिको कामना गर्दै पीडित परिवारप्रति समवेदना समेत व्यक्त गरेका थिए।
विद्यालयका विद्यार्थीहरूले यस्ता जघन्य अपराध दोहोरिन नदिन राज्यले बालबालिकाको सुरक्षा र अपराध नियन्त्रणमा थप प्रभावकारी कदम चाल्नुपर्नेमा जोड दिएका छन्।
