रत्न्नगर । रत्ननगर वडा नं–११, मङ्गलपुरस्थित कानुङ मगर समाजको प्रथम वार्षिक साधारण सभा आइतबार गरिएको छ । समाजका अध्यक्ष नरबहादुर किजिम मगरको अध्यक्षतामा भएको कार्यक्रमको नेपाल मगर समाज जिल्ला समन्वय समितिका अध्यक्ष लालबहादुर रानामगरले उद्घाटन गरेका थिए ।
कार्यक्रममा बोल्ने वक्ताहरुले भाषा संरक्षणमा जोड दिएका थिए । भाषा लोप भए जातीय पहिचान हराउँदै जाने भन्दै उनीहरुले नयाँ पुस्तालाई भाषाको पर्याप्त ज्ञान हुनुपर्नेमा जोड दिएका थिए ।
नेपाल मगर समाज जिल्ला समन्वय समितिका सचिव विष्णुबहादुर आलेमगरले आधुनिकताको प्रभावले परम्परागत संस्कृति हराउँदै गएको भन्दै जातीय पहिचान र परम्परागत भाषा जोगाउन सबै एकजुट हुनुपर्नेमा जोड दिए । आन्तरिक एकताले मात्र परम्परागत भाषा, संस्कृति जोगिने भन्दै उनले युवापुस्ता यसप्रति सकारात्मक हुन जरूरी रहेको बताए ।
कानुङ मगर समाजका अध्यक्ष रानामगरले वार्षिक प्रतिवेदन, नीति तथा कार्यक्रम र कोषाध्यक्ष वीरबहादुर थापा मगरले आर्थिक प्रतिवेदन प्रस्तुत गरेको कार्यक्रममा मगर समुदायको कला–संस्कृति र भाषा संरक्षणमा योगदान गरेको भन्दै पूर्वअध्यक्ष हर्कबहादुर सारूमगर, उपाध्यक्ष कौशिला थापामगर, कोषाध्यक्ष यामबहादुर रानामगर र सदस्यहरु धनबहादुर रानामगर, सीता आलेमगर, सीता थापामगर, सरस्वती बराई मगरलाई सम्मान गरिएको थियो ।
कार्यक्रममा नेपाल मगर संघ नगर समितिका अध्यक्ष रामबहादुर रानामगर, नेपाल मगर महिला संघ जिल्ला कार्यसमिति सदस्य पार्वतीदेवी मगर, वडा नं–११ का वडा सदस्य हर्कबहादुर सारूमगरलगायतले मन्तव्य राखेका थिए । कानुङ मगर समाजकी उपाध्यक्ष नीरा रानामगरले स्वागत मन्तव्य राखेको उक्त कार्यक्रम सचिव नवराज मगरले सञ्चालन गरेका थिए ।
