काठमाण्डौ – अख्तियार दुरुपयोग अनुसन्धान आयोगले सुर्खेतको मालिका सामुदायिक वन उपभोक्ता समूहका पदाधिकारी र लेखापरीक्षकसहित ८ जनाविरुद्ध विशेष अदालत काठमाण्डौमा भ्रष्टाचारको मुद्दा दायर गरेको छ ।
सुर्खेतको चौकुने गाउँपालिका-१ मा रहेको मालिका सामुदायिक वनका तत्कालीन पदाधिकारीहरूले काठ बिक्रीबाट भएको आम्दानी हिनामिना गर्न नक्कली बिल भरपाई तयार पारेको आयोगले जनाएको छ ।
आर्थिक वर्ष २०७२/०७३ देखि २०७६/०७७ सम्म झाडी सफाइ, अग्नी रेखा निर्माण, वन हेरालुको तलब, भैँसी तथा बाख्रापालन लगायत काम नै नभएका शीर्षकमा झुट्टा विवरण बनाई ३९ लाख १२ हजार रुपैयाँ हिनामिना गरेको अख्तियारको आरोप छ ।
यस प्रकरणमा आयोगले वन समूहका पूर्वअध्यक्षहरू खीमबहादुर सावद, पदमसिं सावद र हर्कबहादुर बुढासहित तत्कालीन सचिव र कोषाध्यक्षहरूविरुद्ध बिगो बमोजिम कारबाहीको मागदाबी गरेको छ ।
त्यस्तै, झुट्टा विवरणका आधारमा लेखापरीक्षण प्रतिवेदन तयार पारेको अभियोगमा रजिष्टर्ड लेखापरीक्षकहरू डिल्लीराम पाठक र प्रेमबहादुर विसीविरुद्ध पनि कैद र जरिवानाको मागदाबी गर्दै आरोपपत्र दायर गरेको अख्तियारले जनाएको छ ।
