पहिरोले कान्ति लोकपथ, मध्य पहाडी लोकमार्ग र अरनिको राजमार्ग अवरुद्ध
काठमाण्डौ – पहिरो खसेका कारण कान्ति लोकपथ र अरनिको राजमार्ग अवरुद्ध भएको छ । कान्ति लोकपथको ललितपुर बागमती गाउँपालिका–३ पाङदुरमा पहिरो खसेकाले कान्ति लोकपथ अवरुद्ध भएको हो ।
काठमाण्डौ उपत्यका ट्राफिक प्रहरी कार्यालयका अनुसार बिहान परेको पानीले पहिरो खसेपछि कान्ति लोकपथ हुँदै काठमाण्डौ–हेटौँडा आवतजावत बन्द छ । अहिले पहिलो पन्छाएर खुलाउने प्रयास भइरहेको छ ।
यस्तै अरनिको राजमार्ग अन्तर्गत कोदारी–तातोपानी खण्ड पनि पूर्ण रूपमा अवरुद्ध छ । गएको वैशाख १६ गते सिन्धुपाल्चोकको भोटेकोशी गाउँपालिका–२ कोदारी ईकु पहिरोका कारण राजमार्ग अवरुद्ध भएको हो । केन्द्रीय प्रहरी प्रवक्ता एवं प्रहरी नायब महानिरीक्षक अविनारायण काफ्लेका अनुसार ठूलो पहिरोले सडक खुलाउन समस्या भइरहेको छ ।
पाँच दिनदेखि सडक बन्द हुँदा तातोपानी नाकाबाट हुने व्यापारिक गतिविधि नै ठप्प भएको छ । ईकुपारि अड्किएका कन्टेनरमा रहेका विशेष गरी फलपूmलसहितका सामग्री बिग्रने र कुहिने जोखिम बढेको व्यापारीले बताएका छन् ।
यस्तै मध्य पहाडी लोकमार्गको लमजुङ मध्यनेपाल नगरपालिका–१० बिमिरे भञ्ज्याङमा सडक अवरुद्ध रहेको नेपाल प्रहरीले जनाएको छ ।
