बहुमत प्राप्त सरकारले अध्यादेशको शरण लिनु लोकतन्त्रका लागि दुर्भाग्यपूर्ण : बार अध्यक्ष मिश्र
काठमाण्डौ – नेपाल बार एशोसिएशनका अध्यक्ष प्रा.डा. विजयप्रसाद मिश्रले दुई तिहाइ नजिकको बहुमत प्राप्त सरकारले संसदको विश्वास लिनुको सट्टा अध्यादेशको शरण लिनु लोकतन्त्रका लागि दुर्भाग्यपूर्ण रहेको बताउनुभएको छ ।
विश्व प्रेस स्वतन्त्रता दिवसको अवसरमा काठमाण्डौमा आज बिहान भएको प्रदर्शनका क्रममा उहाँले सरकारको कार्यशैलीप्रति टिप्पणी गर्नुभयो । डा. मिश्रले मेरिटोक्रेसीबाट आएका पदाधिकारीलाई अध्यादेशका नाममा रातारात पदमुक्त गरेर उपलब्धि मान्नु लोकतान्त्रिक पद्धति विपरीत हुने बताउनुभयो ।
त्यस्तै सुकुम्वासी समस्यामा मानवीय संवेदनशीलताको ख्याल नगरी मानिसलाई विस्थापित गरिनु संविधान प्रदत्त आवासको हकविपरीत भएको उहाँको भनाइ छ । अध्यक्ष मिश्रले राष्ट्रिय मानवअधिकार आयोगलाई गएको भदौ २३ र २४ गतेका घटनाको प्रतिवेदन निष्पक्ष रूपमा सार्वजनिक गर्न समेत आग्रह गर्नुभयो ।
प्रेस स्वतन्त्रता अझै पनि विश्वव्यापी रूपमा जोखिममा रहेको र यसको संरक्षणका लागि वर्तमान पुस्ताले निरन्तर सङ्घर्ष गर्नुपर्नेमा उहाँको जोड छ ।
