भरतपुर । जलदेवी सामुदायिक वन उपभोक्ता समूहको अध्यक्षमा मिन्द्राकुमारी श्रेष्ठ निर्वाचित भएकी छिन् । आइतबार राति सम्पन्न मतदानबाट ४५२ मतसहित अध्यक्षमा श्रेष्ठ निर्वाचित हुँदा निकटतम प्रतिद्वन्द्वी ऋषिकेष अर्यालले ४०७ मत प्राप्त गरे ।
नयाँ समितिको उपाध्यक्षमा गोविन्द गुरूङलाई पछि पार्दै भेषनाथ चौलागाईँले विजय हासिल गरेका छन् । चौलागाईँले ५०१ मत प्राप्त गर्दा निकटतम प्रतिद्वन्द्वी गुरूङले जम्मा ३०८ मत प्राप्त गरेका थिए । समितिको सचिवमा भने विन्दुदेवी क्षेत्रीले जीत हात पारेकी छन् । उनले २४५ मत प्राप्त गर्दा निकटतम प्रतिद्वन्द्वी शखा पौलेलले जम्मा ३४ मतमात्र पाइन् ।
कोषाध्यक्षमा सीताकुमारी पौडेलले ४९९ मत प्राप्त गर्दै जीत हासिल गर्दा निकटतम प्रतिद्वन्द्वी रचना लामिछानेले २७० मतमा चित्त बुझाउनु प¥यो । सहसचिवमा रामबहादुर श्रेष्ठले ४३१ मतसहित विजय हासिल गर्दा निकटतम प्रतिद्वन्द्वी रामकुमार लामा थिङले २९५ मत पाए ।
सहकोषाध्यक्षमा भने ओम सुनारलाई पछि पार्दै हीरामाया थापाले विजय हासिल गरेकी छन् । थापाले ५३० मत प्राप्त गर्दा सुनारले जम्मा २१४ मत पाएका थिए । वनका निवर्तमान अध्यक्ष माधव देवकोटाका अनुसार निर्वाचित उमेदवारहरुमा सबैभन्दा बढी मत नै थापाले ल्याएकी हुन् ।
समूहको आठौँ अधिवेशनबाट निवर्तमान अध्यक्षसहित २१ सदस्यीय कार्यसमितिमा महिला कोटाबाहेक अन्य सबै पदमा निर्वाचन भएको निवर्तमान अध्यक्ष देवकोटाले जानकारी दिए । महिला कोटातर्फ जेनजी, दलित र आदिवासी जनजातितर्फका सबै निर्विरोध भएका थिए । वनको पछिल्लो नीतिअनुसार २५ वर्षमुनिका सदस्यलाई पनि नेतृत्वमा ल्याउनु पर्ने प्रावधानसँगै जेनजीतर्फबाट पनि समितिमा आउने बाटो निश्चित भएको छ ।
नयाँ नेतृत्वको लागि लेखा समितिको संयोजकमा समेत निर्वाचन भएको थियो । समितिमा तारामणि घिमिरे ३७० मतसहित निर्वाचित हुँदा निकटतम प्रतिद्वन्द्वी राजन श्रेष्ठले ३३४ मत प्राप्त गरेका थिए । समितिको सदस्यहरुमा भने मीरा श्रेष्ठ र लक्ष्मण पौडेल निर्विरोध चयन भएका थिए । सहमति जुटाउने प्रयास असफल भएपछि केहीबाहेक अधिकांश पदमा निर्वाचन भएको थियो ।
जलदेवी सामुदायिक वन उपभोक्ता समूहमा एक हजार सातसयभन्दा बढी सदस्य सङ्ख्या रहेकामा एक हजार ३६२ सदस्यले मतदानमा भाग लिएका थिए । भरतपुर महानगरपालिकाको वडा नं.१, २ र ११ का उपभोक्ताहरु वनमा सदस्य छन् । सरकारबाट १९९ हेक्टर क्षेत्रफल हस्तान्तरित उक्त वनको संरक्षित क्षेत्र ४५० हेक्टरमा फैलिएको छ ।
