संयुक्त राष्ट्रसङ्घको प्रतिवेदनले अफगानिस्तानमा एक दशकभन्दा लामो समयसम्म चलिरहेको सशस्त्र द्वन्द्वका कारण भएको ठूलो मानवीय क्षति उजागर गरेको छ ।
प्रतिवेदनअनुसार सन् २००९ को जनवरीदेखि २०२१ को अगस्ट मध्यसम्म कम्तीमा ४० हजार सर्वसाधारणको ज्यान गएको छ भने ७७ हजारभन्दा धेरै घाइते भएका छन् ।
संयुक्त राष्ट्रसङ्घीय अफगानिस्तान सहायता मिसन ९युनामा० ले हिजो सार्वजनिक गरेको विस्तृत प्रतिवेदनमा द्वन्द्वबाट प्रभावित १९५ जना व्यक्ति र उनीहरूका परिवारसँग गरिएको अन्तर्वार्ताबाट प्राप्त विवरण समेटिएको छ ।
साथै हिंसा पीडितलाई सेवा प्रदान गरिरहेका २३ राष्ट्रिय तथा अन्तर्राष्ट्रिय गैरसरकारी संस्था र २३ तालिबान अधिकारीसँग गरिएको परामर्श तथा संवादलाई पनि प्रतिवेदनको आधार बनाइएको छ ।
प्रतिवेदनअनुसार अन्तर्वार्ता लिइएका ९५ प्रतिशत व्यक्तिले द्वन्द्वका कारण डिप्रेशन, चिन्ता, घटनाको बारम्बार सम्झना आउनेलगायत मनोवैज्ञानिक तथा भावनात्मक समस्या भोगेको बताएका छन् ।
त्यस्तै ५८ प्रतिशतले सशस्त्र द्वन्द्वका कारण शारीरिक क्षति बेहोरेको बताएका चिनियाँ समाचार संस्था सिन्ह्वाले जनाएको छ । आफ्ना प्राथमिक आवश्यकताबारे सोध्दा ८१ प्रतिशत पीडितले आर्थिक क्षतिपूर्ति, ४८ प्रतिशतले न्यायमा पहुँच तथा ४७ प्रतिशतले मानवअधिकार उल्लङ्नका घटना पुनः हुन नदिन आवश्यक उपायलाई प्राथमिकतामा राखेको प्रतिवेदनमा उल्लेख छ ।
प्रतिवेदनले द्वन्द्वमा सङ्लग्न तथा जिम्मेवार सबै पक्षलाई जबाफदेहीताका प्रयासमा सहयोग गर्न र पीडितका अधिकार तथा आवश्यकतालाई सम्बोधन गर्ने उपायमा योगदान गर्न आग्रह गरेको छ ।
