काठमाण्डौ – काठमाण्डौ उपत्यका र आसपासका जिल्लामा खाना पकाउने ग्यासको अभाव कायमै छ । गएको फागुनमा मध्यपूर्वमा तनाव बढेदेखि नै अभाव हुँदै आएको ग्यास अहिले भोटेकोशीको बाढीले सडक सञ्जाल अवरुद्ध भएपछि थप चर्किएको छ ।
पृथ्वी राजमार्गको कृष्णभीरमा सडक भासिएपछि काठमाण्डौ उपत्यका र आसपासका जिल्लाका उपभोक्ताले ग्यासका लागि थप सास्ती खेप्नुपरेको छ । अभावपछि नेपाल आयल निगम र ग्यास उद्योगीबीच भएको छलफलपछि अत्यावश्यक उपभोक्तालाई राहत पुग्ने गरी ग्यास वितरण गर्न पहल थालिएको छ ।
उद्योगीलाई नेपाल आयल निगमले उपत्यका बाहिर ‘बोटलिङ’ गरी अर्थात् सिलिण्डरमा भरेर ल्याउन अनुमति दिएको छ । नेपाल एलपी ग्यास उद्योग सङ्घका पूर्वअध्यक्ष गोकुल भण्डारीका अनुसार काठमाण्डौ बाहिरका उद्योगमा खाली सिलिण्डर कम छन् । काठमाण्डौमा खाली भएका सिलिण्डरलाई ट्रकमा राखेर उद्योगसम्म पुर्याउनुपर्ने हुन्छ । अनि ती खाली सिलिण्डर भरेर काठमाण्डौ भित्र्याउन थालिएको छ ।
तराईका १५ ग्यास उद्योगमा विभिन्न २६ वटा ब्रान्डका सिलिन्डर भर्न शुरु गरिएको छ । तराईका उद्योगबाट हिजो शुक्रबार ३० हजार सिलिन्डर ग्यास काठमाण्डौ भित्रिएको छ । नेपाल एलपी ग्यास उद्योग सङ्घका अध्यक्ष दिवान चन्दका अनुसार सामान्य अवस्थामा काठमाण्डौ उपत्यकामा दैनिक ४० हजार सिलिण्डर ग्यास आवश्यक पर्छ । तर पहिलेदेखि नै अभाव रहेको हुँदा अहिले दैनिक एक लाख सिलिण्डर पनि खपत हुने अवस्था छ ।
सङ्गठित रूपमा उद्योग र ढुवानीको व्यवस्था गरिरहेकाले केही दिनमा नै ग्यासको समस्या समाधान हुने उहाँको दाबी छ । अध्यक्ष चन्दले आवश्यक मात्र सिलिन्डर साटेर सहज गरिदिन र अहिले अभावको बेला भएकाले अनावश्यक मौज्दात नगर्न उहाँको आग्रह छ ।
एउटा ग्यास बोक्ने बुलेटमा ४५० सिलिन्डर ग्यास आउँछ । ठूलो ट्रकमा भरिएका ५०० सिलिण्डर बोक्ने क्षमता हुन्छ भने खाली ६०० हाराहारी सिलिण्डर बोक्न सक्ने उहाँले बताउनुभयो । निजी क्षेत्रका ग्यास कम्पनीले खाडी संकट, पृथ्वी राजमार्ग अवरुद्ध एवं अन्य बहना देखाउने गरेका कारण उपभोक्तालाई सास्ती भएको छ ।
