नेपाल भलिबल लिग (एनभीएल) मा सगरमाथा स्म्यासर्स र कर्णाली शिवराजले विजयी शुरुआत गरेका छन् । त्रिपुरेश्वरमा रहेको राष्ट्रिय खेलकुद परिषद्को कभर्डहलमा हिजो भएको उद्घाटन खेलमा सगरमाथाले मधेश वारियर्सलाई २५–२१, २५–२१, २३–२५ र २५–२१ को सेटमा पराजित गरेकाे हाे ।
सगरमाथाका अइमल खान ‘म्यान अफ द म्याच’ हुँदै २० हजार नगद पुरस्कार पाए । उनले यो रकम बाढी पीडितको सहयोगार्थ प्रधानमन्त्री दैवी प्रकोप उद्धार कोषमा जम्मा गर्ने घोषणा गरेका छन् ।
त्यस्तै अर्को खेलमा कर्णाली शिवराजले अन्नपूर्ण स्पाइकर्स किङ्सलाई २५–२२, १९–२५, २६–२४ र २५–२२ को सेटमा हरायो । कर्णालीका मार्की खेलाडी पहल गहतराज ‘म्यान अफ म्याच’ बने । उनले पनि नगद २० हजार रुपैयाँ प्राप्त गरेका छन् ।
आज पनि दुई वटा खेल हुँदैछन् । एनभीएलमा ६ टोली सहभागी छन् । नेपाली पुरूष भलिबलमा पहिलो पटक आयोजना गरिएको फ्रेन्चाइज लिगको विजेताले २० लाख रुपैयाँ प्राप्त गर्नेछ । यो नेपाली भलिबलमा अहिलेसम्मकै सर्वाधिक पुरस्कार रकम हो ।
