रत्ननगर । रत्ननगर नगरपालिकाभित्र रहेका सामुदायिक तथा संस्थागत विद्यालयले बिहान ९ बजेदेखि बेलुका ४ बजेसम्म कक्षा सञ्चालन गर्ने तयारी गरेका छन् । शनिबार र आइतबार बिदा गर्दा कोर्स नभ्याइने अवस्थालाई मध्यनजर गरी रत्ननगर नगरपालिकाले समय अवधि बढाउन लागेको हो ।
रत्ननगरका संस्थागत विद्यालयले गत आइतबार पठनपाठन सुरू गरेपछि सङ्कटमा परेका सामुदायिक विद्यालयलाई जोगाउन शिक्षण कार्य समय बढाउन बिहान ९ बजेदेखि ४ बजेसम्म विद्यालय खोल्ने निर्णयमा पुगिएको मेयर प्रलाद सापकोटाले बताए । ‘दैनिक एक घन्टा बढाउँदा एकदिनको समय हुन्छ’, उनले भने, ‘यसो गर्दा कोर्स पूरा गर्न सकिन्छ ।’
मेयर सापकोटाले बिहान ९ बजेदेखि विद्यालय सञ्चालन गर्न सामुदायिक तथा संस्थागत विद्यालयलाई पत्राचार गरिने बताए । आइतबार विद्यालय खोल्ने पक्षमा स्थानीय सरकार रहे पनि केन्द्र सरकारको निर्णय र प्रधानाध्यापकहरुको मनोकाङ्क्षा बुझेर बिहान ९ बजेबाट विद्यालय खुल्ला गर्ने तयारी गरिएको उनको भनाइ छ ।
सामुदायिक विद्यालयले आइतबार पढाउन सुरू गरेपछि उत्पन्न परिस्थितिको समाधान खोज्न बुधबार आयोजित कार्यक्रममा उपमेयर यादवप्रसाद पाठकले सामुदायिक विद्यालयका प्रधानाध्यापक नै आइतबार पढाउन इच्छुक नभएपछि अब बिहान ९ बजेबाट विद्यालय सञ्चालन गर्ने तयारी गरिएको बताए । ‘सरकारी निर्णय मान्दैनौँ भन्ने अवस्था पनि छैन’, उनले भने, ‘विकल्प भनेको एक घन्टा पहिला विद्यालय खोल्ने हो ।’
प्रमुख प्रशासकीय अधिकृत प्रकाश खनालले आइतबार विद्यालय खोल्ने विषयमा आफू सकारात्मक नै रहेको बताए । ‘सरकारी निर्णय मान्दैनौँ भन्न सकिँदैन’, उनले भने, ‘शिक्षकहरु तयार भए स्थानीय सरकारले विद्यालय खोल्न सक्छ ।’
तर, प्याब्सन रत्ननगरले भने सरकारले निर्णय सच्याएर आइतबार विद्यालय सञ्चालन गर्नुपर्ने अडान लिएको छ । देशका अन्य पालिकाहरुमा आइतबार पढाइ सुरू भइसकेको भन्दै प्याब्सन रत्ननगरका अध्यक्ष भुवन थापाले रत्ननगरमा पनि आइतबार पढाइ सुरू गर्नुपर्ने बताए । ‘स्थानीय सरकारले आइतबार पढाउने निर्णय गर्नुपर्छ’, उनले भने, ‘शिक्षालाई ख्याल–ख्याल सोच्न हुँदैन ।’
सामुदायिक विद्यालयका प्रधानाध्यापकहरु भने आइतबार विद्यालय खोल्न नहुने पक्षमा उभिएका छन् । मावि चित्रसारीका प्रधानाध्यापक विष्णु कट्टेलले केन्द्र सरकारको निर्णय शिरोपर गर्नुपर्ने बताए । ‘सरकारको निर्णय लत्याउन हुँदैन’, उनले भने, ‘आइतबार विद्यालय खोल्न हुँदैन ।’
बैरिया माविका प्रधानाध्यापक युवराज शर्मा पौडेल, माधवपुर माविका प्रधानाध्यापक रमेश भट्ट, आधारभूत विद्यालय बेल्सीका प्रधानाध्यापक रामचन्द्र महतो, पञ्चदीप आधारभूत विद्यालयका प्रधानाध्यापक तिलक कुँवर, आधारभूत विद्यालय नमुना टोलका प्रधानाध्यापक बसन्त पौडेलले केन्द्र सरकारबाट अप्ठ्यारो नपर्ने गरी स्थानीय सरकारले विकल्प खोज्नुपर्नेमा जोड दिएका थिए ।
सामाजिक विकास समितिका संयोजक सोहेन्द्रराज खरेलले सामुदायिक विद्यालयका प्रधानाध्यापकहरु आइतबार विद्यालय सञ्चालन गर्ने विषयमा सकारात्मक नहुनु दुःखद रहेको बताए । संस्थागत विद्यालयले स्थानीय सरकारसँग समन्वय गरेरमात्रै आइतबार विद्यालय सञ्चालन गर्नुपर्नेमा जोड थियो ।
