टोरन्टो । क्यानडाको ब्रिटिस कोलम्बियास्थित सर्रेमा चर्चित भारतीय कमेडियन कपिल शर्माको ‘क्याप्स क्याफे’ नजिकै रहेको एक रेस्टुरेन्टमा गोली प्रहार भएको छ।
‘चाय सुट्टा बार’ आउटलेट नजिकै भएको यस घटनाले कपिल शर्माको सुरक्षालाई लिएर गम्भीर चिन्ता पैदा गरेको छ।
घटनालगत्तै सामाजिक सञ्जालमा टायसन बिश्नोई जोरा सिद्धू नामको फेसबुक अकाउन्टबाट एक पोस्ट सार्वजनिक गर्दै कपिल शर्मा र क्याफेका मालिक दुवैलाई ज्यान मार्ने धम्की दिइएको छ। उक्त पोस्टमा ग्याङले कपिल शर्मालाई ‘लाइनमा आउन’ चेतावनी दिँदै आफ्नो कुरा नमाने क्याफेको हालत पनि त्यस्तै हुने संकेत गरेको छ।
कपिल शर्माको क्याफेलाई निशाना बनाइएको यो पहिलो घटना भने होइन। सन् २०२५ देखि नै उनको क्याफेमाथि लगातार आक्रमण भइरहेका छन्।
पहिलो पटक १० जुलाई २०२५ मा क्याफे खुलेको केही दिनमै गोली प्रहार भएको थियो। त्यसपछि ७ अगस्ट २०२५ मा पुनः सोही स्थानमा धेरै राउन्ड फायरिङ गरियो। अक्टोबर २०२५ मा भएको तेस्रो पटकको आक्रमणको जिम्मेवारी भने लरेन्स बिश्नोई नेटवर्कसँग जोडिएका व्यक्तिहरूले सामाजिक सञ्जालमार्फत लिएका थिए।
यो पछिल्लो घटनाले बिश्नोई ग्याङले कपिललाई निरन्तर पछ्याइरहेको र यो एउटा योजनाबद्ध सिलसिला भएको पुष्टि गरेको छ।
ग्याङको दाबी अनुसार कपिल शर्माले ‘द ग्रेट इन्डियन कपिल शो’ को सार्वजनिक कार्यक्रममा बलिउड अभिनेता सलमान खानलाई आमन्त्रण गरेपछि लरेन्स बिश्नोई नेटवर्क उनीसँग चिढिएको हो।
ग्याङका सदस्यहरूले सलमान खानसँग काम गर्ने वा उनलाई साथ दिने जोकोहीले पनि यसको परिणाम भोग्नुपर्ने चेतावनी पहिले नै दिइसकेका थिए। कपिलले सलमानलाई सम्मान दिएकै कारण उनका क्याफे र व्यावसायिक प्रतिष्ठानहरूलाई तारो बनाइएको बुझिएको छ।
आफ्नो क्याफेमा पटक–पटक हुने फायरिङका विषयमा कपिल शर्माले यसअघि पनि मुख खोलिसकेका छन्। उनले आफ्नो फिल्म ‘किस किसको प्यार करूँ २’ को ट्रेलर सार्वजनिक गर्ने क्रममा क्यानडाको सुरक्षा व्यवस्था र प्रहरी प्रशासनमाथि नै प्रश्न उठाएका थिए। त्यहाँको नियम र प्रहरीसँग यस्ता हिंस्रक घटना रोक्ने पर्याप्त शक्ति नभएको उनको आरोप थियो।
