काठमाण्डौ – एसीसी पुरुष प्रिमियर कप क्रिकेटको सेमिफाइनलमा नेपालले आज ओमानसँग खेल्दैछ ।
मलेसियाको क्वालालम्पुरमा रहेको बायुमास ओभलमा हुने खेल नेपाली समयअनुसार अहिले बिहान सवा ७ बजे शुरु हुनेछ । समूह चरणमा उत्कृष्ट प्रदर्शन गर्दै नेपाल समूह ‘ए’ को विजेताका रूपमा सेमिफाइनलमा पुगेको हो ।
नेपालले समूह चरणका पहिलो तीन खेल जितेको थियो भने अन्तिम खेलमा हङकङसँग १५ रनले पराजित भएको थियो । यद्यपि, समान ६ अंक भए पनि राम्रो रनरेटका आधारमा नेपाल समूह विजेता बनेको हो ।
ओमान समूह ‘बी’ को उपविजेता बनेर सेमिफाइनलमा पुगेको हो । ओमानले समूह चरणमा चारमध्ये दुई खेल जितेको थियो । अन्तिम खेलमा भने ओमान संयुक्त अरब इमिरेट्ससँग ४९ रनले पराजित भएको थियो ।
आजको खेलमा जित हात पार्ने टोली प्रतियोगिताको फाइनलमा प्रवेश गर्नेछ । आजै अर्को सेमिफाइनल खेल संयुक्त अरब इमिरेट्स (यूएइ) र हङकङबीच हुँदैछ । फाइनल खेल पर्सि शनिबार हुने तालिका छ ।
