काठमाण्डाै – ओमानलाई हराउँदै नेपाल एसीसी प्रिमियर कप क्रिकेटको फाइनलमा पुगेको छ । मलेशियाको क्वालालम्पुरमा आज भएको सेमिफाइनलमा नेपालले ओमानलाई ८७ रनले हरायो ।
नेपालले दिएको १४८ रनको लक्ष्य पछ्याएको ओमानले २८ ओभर १ बलमा ६० रन बनाउँदा सबै विकेट गुमायो । ओमानका जतिन्दर सिंहले २५, जितेन रामानन्दीले १३ रन बनाए । नेपालका कप्तान सन्दीप लामिछाने र दीपेन्द्रसिंह ऐरीले ३/३ तथा ललित राजवंशी र रोहितकुमार पौडेलले २/२ विकेट लिए ।
यसअघि टस जितेर ब्याटिङ गरेको नेपाल ४५ ओभर ४ बलमा १४७ रन बनाउँदा अलआउट भयो । नेपालका दीपेन्द्रसिंह ऐरीले ५१, बसिर अहमदले ४७, देव खनालले १३, मोहम्मद आसिफले ११ रन बनाए । ओमानका जय विराम ओडेडरा र हसनैन शाहले ३/३ विकेट लिए ।
अब नेपालले उपाधिका लागि पर्सि शनिवार यूएईसँग खेल्नेछ । आजै भएको अर्काे सेमिफाइनलमा यूएईले हङकङलाई ७ विकेटले हरायो ।
हङकङले दिएकाे ७१ रनको लक्ष्य यूएईले ११ ओभर १ बलमा ३ विकेट गुमाएर भेटायाे । यूएईका तनिश सुरीले २७ रन बनाए । हङकङका एहसान खान, किन्चित शाह र कप्तान यासिम मुर्तजाले १/१ विकेट लिए ।
यसअघि टस हारेर ब्याटिङ गरेकाे हङकङले ३० ओभर १ बलमा सबै विकेट गुमाएर ७० रन बनायाे । हङकङका जिशन अलीले १७ रन बनाए । यूएईका हैदर अलीले ६ विकेट लिए ।
एसीसी प्रिमियर कपकाे उपाधि जित्ने टोली एशिया कपमा छनोट हुनेछ । यस्तै फाइनलमा पुग्ने २ र तेस्रो हुने टोली इमर्जिङ टिम्स एशियाका लागि छनोट हुनेछन् ।
