काठमाण्डौ — काठमाण्डौ जोड्ने मुख्य सडक नागढुंगा–मुग्लिन खण्डको कृष्णभीरमा सडक अवरुद्ध भए पनि काठमाण्डौ उपत्यकामा अत्यावश्यक सामग्रीको आपूर्ति अभाव नहुने सरकारी निकायले जनाएका छन् ।
उद्योग, वाणिज्य तथा आपूर्ति मन्त्रालयका अनुसार बजारमा पर्याप्त मात्रामा खाद्यान्न मौज्दात रहेकाले तत्काल अत्यावश्यक वस्तु अभाव हुने छैन । काठमाण्डौ उपत्यकामा वैकल्पिक सडकबाट खाद्यवस्तु आपूर्ति गरिने व्यवस्था भैसकेको मन्त्रालयको भनाइ छ ।
नेपाल आयल निगमले पेट्रोलियम पदार्थ र खाना पकाउने एलपी ग्यासको आपूर्ति वैकल्पिक मार्गबाट निरन्तर गरिने जनाएको छ । निगमका अनुसार अमलेखगञ्ज डिपोमा पाइपलाइनमार्फत पर्याप्त इन्धन आइरहेकाले त्यहाँबाट काठमाण्डौमा पेट्रोल, डिजेललगायतका पेट्रोलियम पदार्थ ल्याउन सकिनेछ । यस्तै, खाना पकाउने एलपी ग्यासको आपूर्तिका लागि पनि वैकल्पिक व्यवस्था गरिएको छ । मालसामानका लागि विभिन्न वैकल्पिक मार्ग प्रयोगमा ल्याइएको छ ।
ठूला गाडीलाई नौबिसे–पालुङ–भैँसे तथा साना गाडी तथा माइक्रोबसका लागि फर्पिङतर्फको वैकल्पिक सडक प्रयोग गर्न सकिने व्यवस्था गरिएको छ । पश्चिम नेपालबाट काठमाण्डौ आउने गाडीका लागि गोरखा सदरमुकाम हुँदै बुंकोट–नाम्जुङ–घैरुङ–दुर्वुङ–सिउरेनीटार हुँदै बेनीघाट जोडिने वैकल्पिक मार्गबारे पनि काम भइरहेको छ ।
अर्को विकल्प गोरखा–नाम्जुङ–बुंकोटघाट हुँदै बेनीघाट निस्कने मार्ग हो । यो मार्ग विशेषगरी पोखरा, गोरखा र पश्चिमतर्फबाट काठमाण्डौ ओहोरदोहोर गर्ने गाडीका लागि उपयोगी हुने देखिएको छ । त्रिशूली नदीमा गएको बाढीले सडकको तल्लो भाग कटान गरेपछि हिजो कृष्णभीरमा करिब २० मिटर लम्बाइको सडकको आधाभन्दा बढी भाग भासिएको छ ।
