काठमाण्डौ – संघीय सरकारले आफ्नो प्रशासनिक संरचनालाई चुस्त र छरितो बनाउने उद्देश्यले गराएको नयाँ संगठन तथा व्यवस्थापन (ओएन्डएम) सर्वेक्षणअनुसार विभिन्न तहका कुल २ हजार ७ सय ५४ दरबन्दी कटौती गरेको छ भने २ सय २९ नयाँ दरबन्दी थप गरेको छ ।
मन्त्रालयको संख्या २२ बाट घटाएर १८ मा झारिएपछि परराष्ट्रबाहेकका १७ मन्त्रालयमा यो नयाँ संरचना स्वीकृत भइसकेको छ । जसअनुसार अब १७ मन्त्रालयमा कुल दरबन्दी १९ हजार ६ सय ६९ मा सीमित भएको छ ।
दरबन्दी कटौतीमा १० सचिव र १ सचिवसरह विशिष्ट श्रेणीका अधिकारी परेका छन् । त्यस्तै ७२ सहसचिव, १८६ उपसचिव र ११९ शाखा अधिकृतका दरबन्दी खारेज भएका छन् । सबैभन्दा धेरै दरबन्दी कृषि, वन तथा पर्यावरण मन्त्रालयबाट एक हजार ५ सय ६२ र ऊर्जा मन्त्रालयबाट ४ सय ७० वटा काटिएको छ ।
यस्तै गृह मन्त्रालयमा ९३ र नवनिर्मित विज्ञान, प्रविधि तथा नवप्रवर्तन मन्त्रालयमा ९० दरबन्दी थपिएका छन् । गृहको नयाँ व्यवस्थापनसँगै यसअघि सहसचिवको दरबन्दी रहेका बैतडी, डडेलधुरा, जुम्लालगायत ९ वटा पहाडी जिल्लामा अब उपसचिवस्तरका कर्मचारी प्रमुख जिल्ला अधिकारी (प्रजिअ) हुने भएका छन् ।
राष्ट्रिय किताबखानामा मन्त्रालयगत दरबन्दी दर्ता भइसकेको छ भने परराष्ट्र मन्त्रालयको ओएन्डएम भने अझै छलफलकै क्रममा रहेको छ । नापी, मालपोत, जिल्ला समन्वय समिति तथा स्वास्थ्य र पूर्वाधार मातहतका तल्लो निकायहरूको भने ओएन्डएम हुन बाँकी छ ।
