बेलायत, फ्रान्स, जर्मनी, इटाली र क्यानडाले इजरायलले कब्जामा रहेको वेस्ट बैंकको संवेदनशील क्षेत्रमा नयाँ बस्ती निर्माणका लागि अघि बढाएको योजनाको विरोध गरेका छन् ।
ती देशहरुले संयुक्त विज्ञप्ति निकाल्दै गर्दै पूर्वी जेरुसेलम नजिकै झण्डै १ हजार २०० नयाँ आवास निर्माणका लागि बोलपत्र आह्वान गर्ने इजरायलको निर्णयलाई ‘अस्वीकार्य’ बताएका बीबीसीले जनाएको छ ।
उनीहरूले यो योजना तत्काल फिर्ता लिन इजरायलसँग आग्रह गरेका छन् । इजरायलको आवास मन्त्रालयले अस्ति बुधवार पूर्वी जेरुसेलम र माले अदुमिम बस्तीबीचको क्षेत्रमा ३ हजार ४०१ स्वीकृत आवास एकाइमध्ये १ हजार २३४ का लागि बोलपत्र आह्वान गरेको थियो ।
झण्डै १२ वर्ग किलोमिटर क्षेत्रमा फैलिएको परियोजनाको बोलपत्र बुझाउने अन्तिम मिति आउँदो महिना अक्टोबर १९ तारिख तोकिएको छ । यसले भविष्यमा प्यालेस्टिनी राज्य स्थापनाको सम्भावनालाई थप कमजोर बनाउने ती देशहरुको भनाइ छ ।
उनीहरूले यस कदमले शान्तिको सम्भावनालाई थप टाढा लैजाने र अन्तर्राष्ट्रिय स्तरमा इजरायलको प्रतिष्ठामा समेत असर पार्ने चेतावनी दिएका छन् । राष्ट्रसंघले पनि यो योजना प्यालेस्टिनी राज्यका लागि ‘अस्तित्वगत खतरा’ भएको जनाएको छ ।
