काठमाण्डौ – तीजका तीन दिन आज, भोलि र पर्सिसम्म नै देशका केही ठाउँमा पानी पर्ने सम्भावना छ ।
मौसम पूर्वानुमान महाशाखाका अनुसार पहाड र तराईका एक/दुई ठाउँमा ठूलो पर्नेछ । आज कोशी, बागमती र गण्डकीका हिमाल तथा पहाड र कर्णाली तथा सुदूरपश्चिम प्रदेशका पहाडी एक/दुई ठाउँमा ठूलो पानी पर्न सक्ने अनुमान छ ।
अरु ठाउँमा पनि बदलीसहित हल्कादेखि मध्यम वर्षाको सम्भावना छ । भोलि तीज पर्वको मुख्य दिन कोशी, बागमती र गण्डकी प्रदेशका हिमाल तथा पहाडसँगै लुम्बिनी र कर्णाली प्रदेशका पहाडी एक/दुई ठाउँमा ठूलो वर्षाको सम्भावना छ ।
अरु केही ठाउँमा हल्कादेखि मध्यम वर्षाको सम्भावना छ । त्यस्तै, पर्सि ऋषिपञ्चमीको दिन कोशी प्रदेशको हिमाल तथा पहाड तथा बागमती, गण्डकी र लुम्बिनी प्रदेशका पहाड तथा तराईका एक/दुई ठाउँमा ठूलो वर्षा हुन सक्ने महाशाखाको अनुमान छ ।
तीजका तीन दिनको अवधिमा विशेषगरी कोशी प्रदेशमा अलि धेरै वर्षा हुन सक्ने अनुमान छ । गएराति सिन्धुपाल्चोक, कास्की, गोरखा, जुम्ला, उदयपुर र इलामलगायतका क्षेत्रमा पनि मध्यमदेखि ठूलो पानी परेको थियो ।
