काठमाण्डौ — विभिन्न राजनीतिक दल एवं सामाजिक संस्थाहरुले सुनसरी, सिराहा लगायतका ठाउँमा उत्पन्न तनावप्रति चिन्ता व्यक्त गर्दै आपसी सद्भाव कायम गर्न अपिल गरेका छन् ।
छुट्टाछुट्टै वक्तव्यमार्फत उनीहरुले शान्ति र सद्भावको लागि अपिल गरेका हुन् । नेपाली कांग्रेस सभापति गगन थापा, उपसभापति विश्वप्रकाश शर्मा लगायतले भिडियो सन्देश जारी गर्दै यो बेला अफवाह, उत्तेजना र प्रतिशोध नभइ संयमता चाहिएकोमा जोड दिनुभएको छ । नेकपा एमाले अध्यक्ष केपी शर्मा ओलीले वक्तव्य निकालेर कुनै पनि प्रकारको भ्रामक प्रचारको पछि नलागी संयमित हुन, सामाजिक सद्भाव र एकता कायम राख्नका लागि सक्रिय हुन अनुरोध गर्नुभएको छ ।
मधेश केन्द्रीत दलहरुले संयुक्त वक्तव्य निकालेर सबै नागरिकलाई संयम र धैर्य बन्न आग्रह गरेका छन् । महन्थ ठाकुर, राजेन्द्र महतो, सिके राउत, समिम अन्सारी र रामकुमार शर्माले संयुक्त वक्तव्यमार्फत शान्ति र सदभावको कामना गरेका हुन् । जसपा नेपालका प्रवक्ता मनिष सुमनले पनि वक्तव्य निकालेर सद्भावको अपिल गर्नुभएको छ ।
राष्ट्रपति, पूर्वराष्ट्रपति र पूर्वराजाले पनि शान्ति र सद्भावको लागि अपिल गरेका छन् । राष्ट्रपति रामचन्द्र पौडेलले सदिऔंदेखि रहिआएको सामाजिक, धार्मिक, जातीय सदभाव, सहिष्णुता, मेलमिलाप र भातृत्व नै नेपालको पहिचान र परम्परा भएको उल्लेख गर्दै शान्ति, अमनचयन र सुव्यवस्था कायम गरी राष्ट्रिय एकतालाई मजबुत बनाउन आग्रह गर्नुभएको छ । पूर्वराष्ट्रपति विद्यादेवी भण्डारीले पनि सबैलाई उच्च संयमता अपनाउन, कुनै पनि प्रकारका अफवाह, घृणात्मक अभिव्यक्ति तथा सामाजिक सद्भाव खलबल्याउने गतिविधिबाट टाढा रहन अपिल गर्नुभएको छ । पूर्व राजा ज्ञानेन्द्र शाहले पनि आपसी सद्भाव कायम राख्न अपिल गर्नुभएको छ ।
सरकारको नेतृत्व गरेको राष्ट्रिय स्वतन्त्र पार्टीका सभापति रवि लामिछानेले अस्ति मंगलबार नै वक्तव्य निकालेर आपसी संवाद र सामाजिक सद्भाव जोगाउन अपिल गर्नुभएको छ । नेपाली कम्युनिष्ट पार्टीले पनि अस्ति मंगलबार नै वक्तव्यमार्फत सामाजिक सद्भाव र एकता कायम राख्न अपिल गरेको छ । श्रम संस्कृति पार्टीका अध्यक्ष हर्क साम्पाङ, राप्रपाका अध्यक्ष राजेन्द्र लिङदेन, कुलमान घिसिङ नेतृत्वको उज्यालो नेपाल पार्टीले पनि आपसी सद्भावको लागि अपिल गरेका छन् । कोशी र मधेश प्रदेश सरकार तथा विभिन्न जिल्ला र पालिकाको तर्फबाट पनि सामाजिक सद्भावको लागि अपिल गरिएको छ ।
विभिन्न पेशागत क्षेत्र, नागरिक संगठन, धार्मिक एवं जातीय संस्थाहरुले पनि सद्भावको अपिल गरेका छन् । उद्योग वाणिज्य महासंघ र नेपाल चेम्बर अफ कमर्शले बक्तव्य निकालेर सामाजिक सद्भाव र शान्ति नै देशको समृद्धि र आर्थिक विकासको पूर्वसर्त रहेको उल्लेख गरेका छन् । नेपाल बार एसोसिएसनले सबै पक्षहरुलाई संयमित भई आपसी सदभाव र सहिष्णुताका लागि सहज बातावरण बनाउन अनुरोध गरेको छ ।
