प्रतिनिधि सभा अन्तर्गतको अर्थ समितिले शेयर बजारमा सुधार ल्याउन र लगानीकर्ताको खस्किएको मनोबल उच्च बनाउन सरकारलाई महत्त्वपूर्ण निर्देशन दिएको छ ।
समितिले अर्थ मन्त्रालय र नेपाल धितोपत्र बोर्ड (सेबोन) लाई पूँजीबजारको आधुनिकीकरण र संरचनागत सुधारका लागि ठोस कदम चाल्न निर्देशन दिएको हो ।
समितिले शेयर बजारप्रति समग्र लगानीकर्ताको विश्वास बढाउन र बजारलाई थप पारदर्शी एवं सुरक्षित बनाउन विभिन्न बुँदामा निर्देशन जारी गरेको छ ।
सरकारी स्वामित्वमा रहेको नेपाल स्टक एक्सचेन्ज लिमिटेड (नेप्से) को पुनर्संरचना सम्बन्धी कार्यलाई तदारुकताका साथ अगाडि बढाउन भनिएको छ । लामो समयदेखि बहसको विषय बनेको नेप्सेको निजीकरण वा रणनीतिक साझेदार भित्र्याउने प्रक्रियालाई यसले थप बल पुर्याउने देखिएको छ ।
पूँजीबजारलाई समयानुकूल आधुनिक बनाउन र धितोपत्रका उपकरणहरूलाई विविधीकरण एवं विस्तार गर्न समितिले जोड दिएको छ । यसले बजारमा नयाँ लगानीकर्ता र नयाँ उपकरणहरूको प्रवेशलाई सहज बनाउने अपेक्षा गरिएको छ ।
बजारमा हुनसक्ने अवाञ्छित गतिविधि नियन्त्रण गर्न र नियमनकारी निकायलाई थप जिम्मेवार बनाउन ‘पारदर्शी नियमन’ गर्न निर्देशन दिइएको छ ।
पछिल्लो समय उतारचढावपूर्ण रहेको शेयर बजारका कारण चिन्तित बनेका लगानीकर्ताहरूको विश्वास र मनोबल बढाउने गरी कार्यसम्पादन गर्न अर्थ मन्त्रालय र धितोपत्र बोर्डलाई सचेत गराइएको छ ।
