नेपाल बीमा प्राधिकरणको अध्यक्ष पदका लागि आवेदन दिने आज अन्तिम दिन रहेको छ । सोमबारसम्मको अवधिमा भने करिब २ दर्जनको आवेदन परिसकेको अर्थमन्त्रालय स्रोतले जनाएको छ ।
आज ५ बजेसम्मको समयसम्म अध्यक्षका लागि आवेदन दिन सकिने छ । सरकारले बीमा प्राधिकरणको अध्यक्षमा बीमा क्षेत्रमा कार्यरत उच्च तहका अधिकारीहरु, बीमा बिषयमा अध्यापन गराउँदै आएका विज्ञहरु, पूर्व प्रसासक, नियामक निकायका पूर्व उच्च अधिकारीहरुबाट आवेदन परेको स्रोतको भनाइ छ ।
राष्ट्रिय योजना आयोगका उपाध्यक्ष डा. गुणाकर भट्ट संयोजक, अर्थ सचिव घनश्याम उपाध्याय र प्रा.डा. फत्त बहादुर केसी विज्ञ सदस्य रहेको बीमा प्राधिकरणको अध्यक्ष छनौट समिति गठन गरिएको थियो । सोही समितिले प्राप्त आवेदनको सर्टलिष्ट गरी कार्यक्षमता परिक्षण तथा प्रस्तुती समेत लिई अन्तिम ३ जनाको नाम नेपाल सरकार समक्ष नियुक्तीका लागि सिफरिस गरिनेछ ।
