चितवन, राप्ती । राप्ती नगरपालिका अन्तर्गत घलान चोक युवा समाजले सामाजिक उत्तरदायित्व अन्तर्गत एकल जेष्ठ महिला लाल माया तामाङको घरमा नयाँ छाना हाल्ने कार्य सम्पन्न गरेको छ। लामो समयदेखि पुरानो तथा जीर्ण जस्ताका कारण वर्षाको पानी घरभित्र पस्ने समस्याबाट पीडित तामाङलाई राहत पुग्ने गरी युवाहरूले सामूहिक पहल गरेका हुन्।
वडाको “विपन्न परिवारलाई जस्तापाता वितरण” शीर्षक अन्तर्गत प्राप्त दुई बन्टल जस्तासहित आवश्यक अन्य सामग्री जस्तै प्लेन सिट, काटी तथा मिस्त्री ज्यालाका लागि स्थानीय स्तरमै रकम संकलन गरिएको थियो। साथै छाना फेर्ने कार्यमा स्थानीय युवाहरूले श्रमदानसमेत गरेका थिए।
कार्यक्रम सफल बनाउन रकम संकलनका लागि पहल गर्ने फुलमान थिङ तामाङ, श्रमदानमा सहभागीका लागि खाना व्यवस्थापन तथा वडाको बजेट समन्वय गर्ने Gresh Tamang, साथै बजेट व्यवस्थापनका लागि विशेष पहल गर्ने Bal Krishna Lama लगायतको योगदानलाई युवा समाजले विशेष धन्यवाद दिएको छ।
त्यसैगरी, श्रमदानमा सहभागी घलान चोकका युवाहरू तथा आर्थिक सहयोग गर्ने सम्पूर्ण सहयोगी हातहरूप्रति पनि समाजले आभार व्यक्त गरेको छ।
घलान चोक युवा समाजले आगामी दिनहरूमा पनि यस्तै सामाजिक तथा मानवीय कार्यहरूलाई निरन्तरता दिने प्रतिबद्धता व्यक्त गर्दै सबैको साथ, सहयोग र एकता कायम रहिरहने अपेक्षा गरेको छ।
