उत्तर कोरियामा महामारीको समयमा मृत्युदण्ड उल्लेखनीय रूपमा बढ्याे : प्रतिवेदन
उत्तर कोरियामा कोभिड–१९ महामारीको समयमा मृत्युदण्डको सङ्ख्या उल्लेखनीय रूपमा बढेको प्रतिवेदन सार्वजनिक भएको छ ।
सन् २०२० जनवरी २०२४ को अन्त्यसम्म कम्तीमा १५३ जनालाई मृत्युदण्ड दिइएको वा मृत्युदण्डको सजाय सुनाइएको दक्षिण कोरियाको राजधानी सियोलमा रहेको गैरसरकारी संस्था ‘सङ्क्रमणकालीन न्याय कार्य समूह (टीजेडब्ल्युजी) को प्रतिवेदनलाई उद्धृत गर्दै बीबीसीले जनाएको छ ।
महामारीअघिको ५ वर्षमा ४४ जनालाई मृत्युदण्ड दिइएको थियो । धर्म, अन्धविश्वास र विदेशी सांस्कृति सामग्रीसँग सम्बन्धित सामान्य घटनाहरूमा पनि मृत्युदण्ड दिइएको खबरमा उल्लेख छ ।
संयुक्त राष्ट्रसङ्घको ऐतिहासिक अनुसन्धानपछि अन्तर्राष्ट्रिय दबावका कारण सन् २०१५ र २०१९ को बीचमा मृत्युदण्डको सङ्ख्यामा कमी आएको थियो । तर उत्तर कोरियाले आफ्नो सिमाना बन्द गरेपछि सन् २०२० मा मृत्युदण्ड दिने क्रम बढेको ‘टीजेडब्ल्युजी’ ले जनाएको छ ।
यो गैरसरकारी संस्थाले किम जाेङ उनको शासनकालको प्रारम्भिक वर्षहरूमा उत्तर कोरियामा मृत्युदण्डको दर उच्चतम स्तरमा रहेको पत्ता लगाएको छ, सन् २०१३ मा ८० जनाभन्दा धेरै जनालाई मृत्युदण्ड दिइएको थियो ।
प्रतिवेदनअनुसार उत्तर कोरियामा सन् २०११ देखि २०२४ सम्म ३५८ जनालाई मृत्युदण्ड दिइएको थियो ।
सांस्कृतिक र वैचारिक नियन्त्रणलाई बलियो बनाउन र राजनीतिक प्रभुत्व कायम राख्न उत्तर कोरियामा मृत्युदण्डको सङ्ख्या बढ्ने उच्च जोखिम रहेको प्रतिवेदनमा उल्लेख छ ।
