काठमाण्डाै – ललितपुरको सातदोबाटोमा रहेको एन्फा कम्प्लेक्स परिसरमा निर्मित ‘जेनजी शहीद’ हरूको शालिक र स्मृति पार्कको अनावरण कार्यक्रम स्थगित भएको छ ।
शहीदका परिवारजनले शालिकमा शहीदहरूको अनुहार मेल नखाएको भन्दै तीव्र असन्तुष्टि जनाएपछि आज हुने भनिएको उद्घाटन कार्यक्रम स्थगित भएको हो ।
गएको वर्ष भदौ २३ र २४ गतेको आन्दोलनमा ज्यान गुमाएका ४५ जना शहीदको सम्झनामा अन्तरिम सरकारको निर्णयअनुसार पौडी पोखरी परिसरको २ रोपनी जग्गामा यो पार्क र शालिकहरू निर्माण गरिएको थियो ।
कार्यक्रममा गृहमन्त्री सुधन गुरुङ, पूर्वाधारमन्त्री सुनील लम्साललगायतका नेताहरू पार्क उद्घाटनका लागि पुगेका थिए । तर औपचारिक अनावरणअघि पर्दा उघारेर हेर्दा २४–२५ वर्षका युवाको शालिक ४०–४५ वर्षको जस्तो देखिएको र काममा गम्भीर हेलचेक्र्याइँ भएको भन्दै आफन्तहरूले आपत्ति जनाएका थिए ।
परिवारजनको गुनासोपछि मन्त्रीहरू उद्घाटन नगरिकन फर्किएका छन् । अब १ महिनाभित्र सबै शालिकलाई पुनर्निर्माण गरेर मात्र पार्कको उद्घाटन गरिने बताइएको छ ।
