नारायणघाट । सम्पूर्ण किताब नारायणगढले सामुदायिक विद्यालयमा अध्यनरत एक जना छात्रालाई छात्रावृत्ति प्रदान गरेको छ। सम्पूर्ण किताबको नवौँ स्थापना दिवसका अवसरमा कालिका नगरपालिका–३, पदमपुरस्थित राष्ट्रिय जनहित माध्यमिक विद्यालयमा कक्षा–८ मा अध्ययनरत प्रमिका दोङलाई शैक्षिकसामग्री प्रदान गरिएको हो।
शैक्षिक दिवसको अवसर पारेर स्थापना गरेको सम्पूर्णले स्थापनाकालदेखि नै हरेक वर्ष सामुदायिक विद्यालयमा अध्ययनरत एक जना विद्यार्थीलाई शैक्षिक सामग्री प्रदान गर्दै आएको छ। शैक्षिक सामग्रीसमेत जटाउन कठिन पर्ने विद्यार्थीलाई प्राथमकिताका साथ शैक्षिक सामग्री प्रदान गर्दै आएको सम्पूर्ण किताबका सञ्चालक लेखराम सापकोटाले जानकारी दिए।
पूर्वशिक्षक एवम् साहित्यानुरागी पोषराज पौडेल, अध्यता एवम् समीक्षक उदय अधिकारी, लेखक एवम् नेपाल पत्रकार महासंघ चितवनका अध्यक्ष वसन्तराज पराजुलीलगायतको उपस्थितिमा विद्यार्थी प्रमिकासँगै विद्यालयबाट प्रधानाध्यापक कमला पाण्डेलाई सम्पूर्ण किताबले उक्त सामग्री हस्तान्तरण गरेको हो।
विद्यालयकी प्रधानाध्यापक पाण्डेले सम्पूर्ण किताबले राष्ट्रिय जनहित माध्यमिक विद्यालयलाई छनौट गर्नु नै सकारात्मक पक्ष भएको बताइन्। उनले विद्यालयको विषयमा जानकारी गराउँदै सुकुम्बासी बस्तीमा रहेको विद्यालयमा अध्ययनरत विद्यार्थी सबैको अवस्था दयनीय रहेको बताइन्।
‘हाम्रो विद्यालय अहिलेसम्म पूर्जाविहीन जमिनमा बसिरहेको छ । यहाँका अभिभावक सबैको आर्थिक अवस्था कमजोर छ,’ उनले भनिन्, ‘धन्न यसपटक वडाअध्यक्ष शैक्षिक व्यक्तित्व नै भएकोल हरेक वर्ष वडाले थोरैथोरै बजेट उपलब्ध गराउँदा विद्यालय सञ्चालनमा सहज भएको छ,’ उनले भनिन्, ‘यसरी ५३० जना विद्यार्थी सामुदायिक विद्यालयमा अडिरहेका छन्।’
