खसीको मासु भन्दै बाख्रीको मासु बिक्री गरेको आरोपमा काठमाडौंको रातोपुलबाट तीन जना पक्राउ परेका छन् ।
काठमाडौं महानगरपालिका–८ रातोपुलस्थित सफिक मासु पसलमा अनुगमनका क्रममा खसीको मासु भन्दै प्रतिकिलो १ हजार ८ सय रुपैयाँमा बाख्रीको मासु बिक्री भइरहेको पाइएको थियो ।
पसलको भित्री सटरमा बाख्री काटेर मासु बिक्रीका लागि राखिएको तथा काट्ने अवस्थामा एउटा जिउँदो बाख्रीसमेत फेला परेपछि प्रहरीले उनीहरूलाई नियन्त्रणमा लिएको हो ।
पक्राउ पर्नेमा मासु पसल सञ्चालक भारत सितामढी घर भई हाल रातोपुल बस्ने २५ वर्षीय महमद इम्रान मन्सुरी, नुवाकोट घर भई हाल सिफल बस्ने १८ वर्षीय अरुण कार्की र मकवानपुर हेटौंडा उपमहानगरपालिका–३ घर भई हाल रातोपुल बस्ने २१ वर्षीय सुजन रसाइली छन्।
उनीहरूलाई प्रहरी वृत्त गौशालामा राखी थप अनुसन्धान भइरहेको प्रहरीले जनाएको छ।
