काठमाण्डाै – कक्षा ५ मा पढ्ने मनिष बस्नेत ३ दिनदेखि काठमाण्डाैकाे सडकमा ग्यास किन्न लाइनमा बस्न बाध्य हुनुभएको छ ।
घरमा चुलो बाल्ने ग्यास सिद्धिएपछि शनिवारदेखि डिपो अगाडि सिलिन्डर राखेर कुरिरहनुभएकाे उहाँ ग्यास नपाउँदा विद्यालय जान पाउनुभएको छैन ।
आमाबुबा ज्याला–मजदुरीमा जानुपर्ने बाध्यता भएपछि मनिष सिलिन्डर कुर्न सडकमा बस्नुभएको हो । सडकको पेटीमा सिक्री र ताल्चाले बाँधिएका सिलिन्डरको लाममा पहरा दिँदै गरेका उहाँले भाेलि मङ्गलवारसम्म मात्र ग्यास आउने खबर पाएको बताउनुभयो ।
उहाँले भन्नुभयो, ‘ग्यास छैन भनेकाले स्कुल जान पाइनँ, १ दिनको बिदा लिएर आएको थिएँ, अहिले लाइन छोडेर अन्त गयो भने पछाडिको मान्छेले आफ्नो सिलिन्डर अगाडि तानिदिन्छन् । जुन नेता आए पनि ग्यासको लाइन बस्नुपर्ने अवस्था कहिल्यै हटेको छैन ।’
१ दिनको बिदा लिएर लाइन बसेका मनिष ४ दिन बस्नुपर्ने निश्चित भएको छ ।
नेपाल आयल निगम र सरकारी अधिकारीहरूले बजारमा खाना पकाउने एलपी ग्यासको कुनै अभाव नरहेको दाबी गरिरहेका छन् । तर सडकमा सर्वसाधारणसँगै बालबालिकाहरू दिनभर ग्यासको लाइनमा बस्नुपर्ने बाध्यताले सरकारी दाबी र यथार्थको फरक छर्लङ्ग पारेको छ ।
