राप्ती, भदौ २ ।
पूर्वी चितवनको राप्ती नगरपालिकाभित्र सञ्चालित निजी विद्यालयहरूले भदौ १ गतेदेखि लागू हुने गरी शुल्क वृद्धि गरेका छन्। नगर शिक्षा समितिको साउन २५ गते बसेको बैठकले कक्षाअनुसार ३० देखि ४० प्रतिशतसम्म शुल्क बढाउने निर्णय गरेको हो।
प्याब्सन राप्तीको ध्यानाकर्षण तथा प्रस्ताव प्रतिवेदनका आधारमा नगरपालिकाले यो निर्णय गरेको हो। नयाँ निर्णयअनुसार नर्सरीदेखि कक्षा ५ सम्म ४० प्रतिशत र कक्षा ६ देखि १० सम्म ३० प्रतिशतका दरले शुल्क वृद्धि गरिएको छ। राप्तीमा प्रत्येक तीन-तीन वर्षको अन्तरालमा निजी विद्यालयको शुल्क बढाउने प्रावधान रहेको छ।
सरकारले आर्थिक वर्ष २०८३/०८४ देखि लागू हुने गरी शिक्षक-कर्मचारीको १० प्रतिशत आधारभूत तलब, १० प्रतिशत प्रोत्साहन भत्ता र ५ हजार रुपैयाँ महँगी भत्ता वृद्धि गरेको सन्दर्भमा, विद्यालयहरूलाई पनि सोही बढेको शुल्कको अनुपातमा शिक्षकहरूलाई तलब सुविधा उपलब्ध गराउन प्याब्सन राप्तीका अध्यक्ष दीपक सारूले आग्रह गर्नुभएको छ।
