काठमाडौँ। अविरल वर्षासँगै आएको बाढी र पहिरोका कारण देशका विभिन्न भागका प्रमुख राजमार्ग प्रभावित भएका छन्।
नेपाल प्रहरीका अनुसार शुक्रबार बिहान ८ः३० बजेसम्म सात प्रमुख राजमार्ग पूर्ण रूपमा अवरुद्ध रहेका छन् भने दुई सडकखण्डमा मात्र एकतर्फी यातायात सञ्चालन भइरहेको छ।
प्रहरीको विवरणअनुसार ललितपुरको कान्तिलोकपथ, इलामको मेची राजमार्ग, खोटाङको मध्यपहाडी लोकमार्ग, सिन्धुपाल्चोकको अरनिको राजमार्गका दुई स्थान, बागलुङको कालीगण्डकी करिडोर र दार्चुलाको महाकाली राजमार्ग पहिरो तथा अविरल वर्षाका कारण पूर्ण रूपमा बन्द भएका छन्।
यस्तै, भोजपुरस्थित मध्यपहाडी लोकमार्ग र रसुवाको पासाङ ल्हामु सडकखण्डमा पहिरो र बाढीका कारण एकतर्फी रूपमा मात्रै सवारी सञ्चालन भइरहेको छ।
यसैबीच, सम्भावित बाढीको जोखिमलाई ध्यानमा राख्दै काभ्रेको बीपी राजमार्गमा रातिको समयमा सवारी आवागमन रोकिएको छ। बिहान ४ बजेदेखि साँझ ६ बजेसम्म भने सडकको अवस्थाको मूल्याङ्कन गरी सवारी सञ्चालन गरिने व्यवस्था गरिएको छ।
त्यस्तै, मकवानपुर-ललितपुर जोड्ने कान्तिलोकपथमा पनि रातिको समयमा सवारी सञ्चालन बन्द गरिएको छ। अर्को सूचना जारी नभएसम्म यो व्यवस्था कायम रहने नेपाल प्रहरीले जनाएको छ।
मनसुन अझै सक्रिय रहेकाले थप सडकमा पनि पहिरो र बाढीको जोखिम बढ्न सक्ने भन्दै प्रहरीले अत्यावश्यकबाहेक लामो दूरीको यात्रा नगर्न तथा यात्रा गर्नुअघि सम्बन्धित जिल्ला प्रहरी वा ट्राफिक प्रहरीसँग सडकको पछिल्लो अवस्था बुझेर मात्र यात्रा गर्न सर्वसाधारणलाई आग्रह गरेको छ।
