काठमाण्डौ – आईसीसी विश्वकप क्रिकेट लिग–२ खेल्न नेदरल्यान्ड्स पुगेको नेपाली टोलीले आज नामिबियासँग पहिलो खेल खेल्दैछ । खेल नेपाली समयअनुसार दिउँसो पौने ३ बजे शुरु हुनेछ ।
यो त्रिदेशीय शृङ्खलामा आयोजक नेदरल्यान्ड्स, नेपाल र नामिबिया सहभागी छन् । नेपालले दोस्रो खेल पर्सि साउन ७ गते आयोजक नेदरल्यान्ड्ससँग खेल्नेछ । त्यसपछि साउन ११ गते पुनः नामिबियासँग र साउन १३ गते नेदरल्यान्ड्ससँग प्रतिस्पर्धा गर्ने तालिका छ ।
अहिले लिग–२ को अङ्कतालिकामा नेपाल २४ अङ्कसहित पाँचौँ स्थानमा छ । नेदरल्यान्ड्स ३२ अङ्कसहित तेस्रो, नामिबिया २२ अङ्कसहित सातौँ स्थानमा छन् । अङ्कतालिकाको शीर्ष स्थानमा अमेरिका, दोस्रोमा स्कटल्यान्ड र चौथोमा ओमान रहेका छन् ।
विश्वकप ग्लोबल क्वालिफायरमा स्वतः स्थान बनाउन शीर्ष चारभित्र रहनुपर्ने भएकाले नेपालका लागि बाँकी खेलहरू निकै महत्त्वपूर्ण छन् । घरेलु मैदान कीर्तिपुरमा सम्पन्न पछिल्लो शृङ्खलामा नेपालले आठमध्ये ६ खेल जित्दै आफ्नो अवस्था बलियो बनाएको थियो । त्यही लयलाई निरन्तरता दिने लक्ष्यका साथ नेपाली टोली नेदरल्यान्ड्स पुगेको छ । विश्वकप लिग–२ मा हरेक टोलीले ३६ खेल खेल्नेछन् ।
नेपालले अझै आठ खेल बाँकी रहेकाले शीर्ष चारमा पुग्ने सम्भावना कायम छ । यस्तै, एक दिवसीय मान्यता जोगाउन भने शीर्ष ६ भित्र रहनु पर्छ । यो शृङ्खलाका लागि कप्तान रोहितकुमार पौडेलको नेतृत्वमा १५ सदस्यीय नेपाली टोली नेदरल्यान्ड्स पुगेको हो ।
