बारा, ०४ साउन । बाराको सुवर्ण गाउँपालिका–७ चौरहियामा धान खेतमा जमेको पानीमा डुबेर एक १८ महिने बालिकाको मृत्यु भएको छ।
महागढीमाई नगरपालिका-९ बलुवा निवासी राजिन्द्र महतोकी १८ महिने छोरी लालु कुमारी महतो आफ्नो मामा घर आएकी थिइन्। आइतबार साँझ करिब ५ः३० बजे मामा घरपछाडि रहेको तारा चन्द साहको धान खेतमा जमेको पानीमा खेल्ने क्रममा उनी अचानक डुबेकी हुन्।
घटनापछि बालिकाको शव मामा घरमा ल्याइएको जानकारी साँझ ६ः१५ बजे प्रहरी चौकी बड्कीफुलबरियामा प्राप्त भएको थियो। खबर पाउनासाथ प्रहरी सहायक निरीक्षक रामविध्या साहको कमाण्डमा खटिएको टोलीले घटनास्थल पुगेर सुरक्षा दिएको थियो।
घटनाको थप अनुसन्धान तथा आवश्यक कानुनी प्रक्रिया पूरा गर्न जिल्ला प्रहरी कार्यालय बाराबाट प्रहरी निरीक्षक विमल खतिवडाको कमाण्डमा मुचुल्का टोली खटिएको छ। जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक मीनबहादुर घलेले घटनाबारे थप अनुसन्धान कार्य भइरहेको जानकारी दिएका छन्।
