बारा, ०४ साउन । बाराको प्रसौनीमा ग्यास लिक भई आगलागी हुँदा एक जना घाइते भएका छन्।
गए राति प्रसौनी गाउँपालिका वडा नं. ५ बहुअरी टोलमा डेरा गरी बस्ने पर्सा सखुवाप्रसौनी गाउँपालिका वडा नं. ३ घर भएका ३३ वर्षीय महेश पटेल घाइते भएका हुन्।
कोठामा खाना पकाउने क्रममा अचानक एलपिजी ग्यास लिक भई उनको सर्टमा आगो सल्किएको थियो। आगलागीबाट पटेलको अनुहार, छाती, पिठ्युँ र दुवै हात जलेका छन्। घाइते पटेलको हाल पर्सास्थित गण्डक हस्पिटलमा मध्यम अवस्थामा उपचार भइरहेको छ भने अस्पतालमा उनका आफन्तहरू समेत उपस्थित रहेका छन्।
घटनाबारे थप अनुसन्धान कार्य भइरहेको जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक मीनबहादुर घलेले जानकारी दिए।
