फिफा विश्वकप २०२६ को फाइनल खेल सकिएलगत्तै मैदानभित्रै खेलाडीबीच हातपात र झडप भएको छ । अतिरिक्त समयमा १–० को नतिजासहित स्पेनसँग पराजित भएपछि आक्रोशित बनेका अर्जेन्टिनाका खेलाडी मैदानमै हातपातमा उत्रिएका हुन् ।
खेल सकिएको अन्तिम सिठ्ठी बजेलगत्तै स्पेनका मिडफिल्डर रोड्रि उपाधि जितेको खुसीयाली मनाउन दौडिरहेका थिए । सोही क्रममा अर्जेन्टिनाका डिफेन्डर नाहुएल मोलिनाले उनलाई पछाडिबाट धक्का दिएपछि मैदानमा तनाव उत्पन्न भएको थियो । मोलिनाको हर्कतपछि दुवै टोलीका खेलाडीहरूबीच भनाभन र धकेलाधकेल सुरु भएको थियो ।
झडपका क्रममा अर्जेन्टिनाका मिडफिल्डर लिएन्ड्रो पारेडेस सबैभन्दा आक्रामक रूपमा प्रस्तुत भएका थिए । उनले स्पेनिस खेलाडीलाई लगातार धक्का दिनुका साथै मुक्का प्रहार गर्ने प्रयास समेत गरेका थिए । मैदानभित्र स्थिति तनावग्रस्त बनेपछि दुवै टोलीका अन्य खेलाडी र अफिसियलले झगडा साम्य पारेका थिए ।
यसअघि निर्धारित समय गोलरहित बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयमा फेरान टोरेसले गरेको निर्णायक गोलको मद्दतमा अर्जेन्टिनालाई पराजित गर्दै स्पेनले इतिहासमा दोस्रो पटक विश्वकपको उपाधि चुमेको हो ।
