ब्राजिलका राष्ट्रपति लुइज इनासियो लुला दा सिल्भा चौथो कार्यकालका लागि फेरि निर्वाचित हुनु भएको छ । कडा प्रतिस्पर्धाबीच उहाँले दक्षिणपन्थी नेता फ्लाभियो बोल्सोनारोलाई पराजित गर्नुभएको छ ।
मतगणना सम्पन्न हुँदा लुलाले ५१.७६ प्रतिशत मत प्राप्त गर्नुभएको बीबीसीले जनाएको छ । उहाँका प्रतिस्पर्धी फ्लाभियो बोल्सोनारोले ४८.२४ प्रतिशत मत पाउनु भएको छ ।
चुनावमा पहिलो चरणमा बोल्सोनारोले अग्रता लिएपछि लुलाको जित कठिन हुने आंकलन गरिएको थियो । तर, दोस्रो चरणमा मतदाताको समर्थन जुटाउँदै लुलाले परिणाम उल्ट्याउन सफल हुनुभएको हो ।
सन् १९८८ मा ब्राजिलमा लोकतन्त्र पुनस्र्थापित भएयता पहिलो चरणमा पछि परेको उम्मेदवारले दोस्रो चरणमा जित हासिल गरेको यो पहिलो घटना भएको खबरमा उल्लेख छ । ८० वर्षीय लुलाले यसअघि सन् २००३ देखि २०१० सम्म ७ वर्ष दुई कार्यकाल र सन् २०२३ देखि अहिलेसम्म ३ वर्ष राष्ट्रपतिको जिम्मेवारी सम्हाल्दै आउनु भएको थियो ।
लुलाको जितपछि समर्थकहरूले उत्सव मनाएका छन् । कतिपय समर्थक खुशीले रोएका छन् भने सडकमा आतसबाजी र गीत संगीतसहित विजय उत्सव चलिरहेका छन् । राजधानी फ्लाभियो बोल्सोनारोका समर्थकहरू निराश हुँदै मतगणना स्थलबाट बाहिरिएको बीबीसीले जनाएको छ ।
मतगणनाका क्रममा प्रतिस्पर्धा निकै कडा देखिए पनि अन्ततः लुलाले झिनो मतान्तरले जित हासिल गर्नुभयो । लुलाको यो जितलाई ब्राजिलको राजनीतिमा उहाँको पुनरागमनका रूपमा हेरिएको छ । साथै, ल्याटिन अमेरिकाका केही देशमा दक्षिणपन्थी नेतृत्व बलियो भइरहेका बेला लुलाको जितले क्षेत्रीय राजनीतिक प्रवृत्तिबारे पनि नयाँ बहस सिर्जना गरेको छ ।
