अमेरिकाले इरानमाथि सुरु गरेको सैन्य आक्रमण सोमबार दिउँसोसम्म पनि जारी रहेको इरानी सञ्चारमाध्यमहरूले जनाएका छन् ।
सप्ताहन्तभर सयौं सैन्य लक्ष्यमा बमबारी गरेपछि सोमबार पनि विभिन्न क्षेत्रमा विस्फोट र आक्रमण जारी रहेको बताइएको छ ।
अर्धसरकारी समाचार संस्था तस्निमका अनुसार स्थानीय समयअनुसार दिउँसो करिब १ः४५ बजे दक्षिणपश्चिमी इरानको अबादान सहरका तीन स्थानमा आक्रमण भएको थियो । खुजेस्तान प्रान्तका सहायक गभर्नरलाई उद्धृत गर्दै तस्निमले आक्रमणमा कम्तीमा दुई जनाको मृत्यु भएको र अन्य तीन जना घाइते भएको जनाएको छ ।
यसैबिच अर्धसरकारी समाचार संस्था मेहरका अनुसार स्थानीय समयअनुसार मध्यान्हतिर दक्षिणी इरानको बन्दर अब्बास सहर र किश्म टापुनजिक पनि शक्तिशाली विस्फोटको आवाज सुनिएको थियो ।
ती क्षेत्रमा भएको क्षति वा सम्भावित मानवीय हताहतीबारे विस्तृत विवरण भने सार्वजनिक गरिएको छैन । घटनाबारे प्रतिक्रिया लिन अन्तर्राष्ट्रिय सञ्चारमाध्यम सीएनएनले अमेरिकी केन्द्रीय कमान्ड र अमेरिकी रक्षा मन्त्रालयअन्तर्गतको रक्षा सचिवको कार्यालयसँग सम्पर्क गरेको जनाएको छ ।
यद्यपि समाचार तयार पार्दासम्म अमेरिकी पक्षबाट कुनै आधिकारिक प्रतिक्रिया सार्वजनिक भएको छैन ।
