काठमाण्डाै – विश्व फुटबलको सर्वाेच्च निकाय फिफाका अध्यक्ष जियानी इन्फान्टिनोले सन् २०३० को विश्वकपमा सहभागी टोलीको सङ्ख्या ६४ पुर्याउने सम्भावनाबारे छलफल हुने बताउनुभएको छ ।
स्वीस सञ्चारमाध्मम ‘ब्लूविन’ सँगको अन्तर्वार्तामा फिफा अध्यक्षले थप १६ टोली थपेर ४८ बाट ६४ पुर्याउनेबारे अहिले चलिरहेको विश्वकप समाप्त भएपछि सम्बन्धित समितिहरूमा अध्ययन र छलफल हुने बताउनुभयो ।
उहाँका अनुसार विश्वकप आयोजना गर्दा युरोप र दक्षिण अमेरिकालाई मात्र नभई सम्पूर्ण विश्वलाई ध्यानमा राख्नुपर्छ । हरेक देशले विश्वकपमा खेल्ने सपना देख्न पाउनुपर्ने इन्फान्टिनोको भनाइ छ ।
सन् १९९८ देखि २०२२ सम्म विश्वकपमा ३२ टोली सहभागी हुँदै आएका थिए । अहिले अमेरिका, क्यानडा र मेक्सिकोमा संयुक्त रूपमा चलिरहेको २३औँ संस्करणको विश्वकपमा पहिलो पटक ४८ टोली सहभागी छन् । फिफा अध्यक्षले ४८ टोली सहभागी विश्वकपलाई ठूलो सफलताको संज्ञा दिनुभएको छ ।
यद्यपि विश्वकपमा ६४ टोली सहभागी हुने प्रस्तावप्रति सबै पक्ष सहमत छैनन् । युरोपेली फुटबल महासङ्घ (यूईएफए), एशियाली फुटबल महासङ्घ (एएफसी), उत्तर तथा मध्य अमेरिकी फुटबल महासङ्घ (कन्काकाफ) ले यो प्रस्ताव उपयुक्त नहुने बताएका छन् ।
सन् २०३० को विश्वकप मुख्यतया स्पेन, पोर्चुगल र मोरक्कोले संयुक्त रूपमा आयोजना गर्नेछन् भने प्रतियोगिताको शताब्दी वर्ष मनाउनका लागि उद्घाटनका ३ खेल अर्जेन्टिना, उरुग्वे र पाराग्वेमा आयोजना हुनेछन् ।
