राप्ती, चितवन । राप्ती नगरपालिकाको पहाडी तथा दुर्गम क्षेत्रमा लामो समयदेखि नागरिकताबाट वञ्चित स्थानीयलाई गाउँमै पुगेर नागरिकता वितरण गरिएको छ। जिल्ला प्रशासन कार्यालय चितवनको टोलीले राप्ती नगरपालिका–१२ र १३ का विभिन्न बस्तीका ११२ जनालाई नागरिकता तथा ५९ जनालाई मतदाता परिचयपत्र वितरण गरेको हो।
नागरिकता वितरणका क्रममा दुबै आँखाले देख्न नसक्ने अशक्त व्यक्तिलाई समेत टोलीले नागरिकता प्रदान गरेको छ। त्यस्तै लामो समयदेखि नागरिकताविहीन रहेकी राप्ती–१३ की ७३ वर्षीया विष्णुमाया प्रजाले समेत नागरिकता प्राप्त गरिन । उनले वृद्ध अवस्थामा नागरिकता पाएपछि खुसी व्यक्त गरेकि थिइन ।
राप्ती–१२ र १३ वडा कार्यालयको सक्रियतामा नागरिकता वितरणको प्रक्रिया अघि बढाइएको थियो। आवश्यक कागजात जुटाउन नसकेका तथा जिल्ला सदरमुकामसम्म पुग्न नसक्ने नागरिकका लागि वडा कार्यालयले घरघरमै पुगेर सर्जिमिन मुचुल्का तयार गरी आवश्यक कागजात जिल्ला प्रशासन कार्यालयमा पठाएको थियो। सोही प्रक्रियाका आधारमा गाउँमै नागरिकता वितरण गरिएको वडा कार्यालयले जनाएको छ।
राप्ती–१३ का वडा अध्यक्ष अशोक प्रजाका अनुसार कागजात जुटाउने झन्झटिलो प्रक्रिया, आर्थिक अभाव तथा नागरिकता लिनुपर्ने विषयमा पर्याप्त जानकारी नहुँदा पहाडी क्षेत्रका धेरै नागरिक लामो समयदेखि नागरिकताबाट वञ्चित हुँदै आएका थिए।
पहाडी भूगोलका कारण वडा कार्यालयसम्म पुग्नसमेत कतिपय बस्तीका नागरिकले करिब तीन घण्टासम्म पैदल यात्रा गर्नुपर्ने अवस्था छ। नगरपालिका कार्यालयसम्म आउजाउ गर्न मात्रै करिब १ हजार ५ सय रुपैयाँ तथा जिल्ला प्रशासन कार्यालय चितवनसम्म पुग्दा २ हजारदेखि २ हजार ५ सय रुपैयाँसम्म खर्च हुने स्थानीयको भनाइ छ। कतिपय बस्तीमा कच्ची सडकसमेत नपुगेकाले पैदल गोरेटोको भरमा आवतजावत गर्नुपर्ने अवस्था छ।
सीमान्तकृत चेपाङ समुदायको उल्लेख्य बसोबास रहेको यस क्षेत्रमा अधिकांश परिवारको जीविकोपार्जन कृषि तथा ज्यालामजदुरीमा निर्भर छ। स्थानीयका अनुसार उत्पादनले वर्षभरि खानसमेत नपुग्ने परिवारका लागि सदरमुकामसम्म पुगेर सरकारी सेवा लिनु थप आर्थिक भार बन्ने गरेको छ।
राप्ती–१३ को वडा कार्यालयमा आयोजित कार्यक्रममा प्रमुख जिल्ला अधिकारी गोकर्ण अर्यालसहित जिल्ला निर्वाचन कार्यालयका प्रतिनिधिहरूको उपस्थितिमा नागरिकता तथा मतदाता परिचयपत्र वितरण गरिएको थियो।
वडा अध्यक्ष प्रजाले आफ्नो वडामा अझै केही नागरिक नागरिकता प्राप्त गर्न बाँकी रहेको बताउँदै आगामी दिनमा उनीहरूको विवरण संकलन गरी आवश्यक प्रक्रिया अघि बढाइने जानकारी दिए।