भरतपुर । चितवनका खेलकुद संघसंस्थाले नुवाकोट र रसुवाको बाढीप्रभावित क्षेत्रमा दुई लाख बढीको सहयोग गर्ने भएका छन् ।
चितवन जिल्ला खेलकुद विकास समितिले बाढीप्रभावित क्षेत्रमा राहतका लागि सहयोग गर्न जिल्लाका सबै खेलकुद संघसंस्थालाई अपिल गरेको थियो । समितिको अपिलपछि विभिन्न खेलकुद संघसंस्थाबाट दुई लाख सात हजार १६० रूपैयाँ सङ्कलन भएको छ । यसबाट प्रभावित क्षेत्रमा ट्रयाकसुटलगायतका लत्ताकपडा सहयोग गर्ने निर्णय भएको समितिका अध्यक्ष राजन कार्कीले बताए ।
प्रभावित क्षेत्रका जनप्रतिनिधिसँगको कुराकानीपछि त्यस क्षेत्रमा तत्कालका लागि लत्ताकपडा सहयोग गर्न सुझाव प्राप्त भएकोले सो रकमबराबरको ट्रयाकसुटलगायतका लत्ताकपडा सहयोग गर्न लागिएको उनले बताए । प्रभावित क्षेत्र पुगेर आवश्यक लत्ताकपडालगायतका राहत सामग्री वितरण गरिने समितिका कार्यालय प्रमुख रामजी ढकालले बताए ।
यसका लागि समितिले ५० हजार रूपैयाँ सहयोग गरेको छ । चितवन जिल्ला ब्याडमिन्टन संघले २९ हजार ५ रूपैयाँ, तेक्वान्दो संघले २५ हजार, तेक्वान्दो संघकै अध्यक्ष शैलेश श्रेष्ठले जन्मदिनको अवसरमा व्यक्तिगतरुपमा ५ हजार, क्रिकेट संघ र भलिबल संघले २०–२० हजार तथा एथ्लेटिक्स संघले १८ हजार रूपैयाँ सहयोग गरेका छन् ।
यस्तै, मुवाथाई संघले १५ हजार १५५, कबड्डी संघ र सितोरियो कराँते संघले १०–१० हजार तथा सितोरियो सोवुकान कराँते संघले ५ हजार रूपैयाँ सहयोग गरेका छन् । राहत लिएर प्रभावित क्षेत्रसम्म पुग्नका लागि बागमती प्रदेश खेलकुद विकास परिषद्का सदस्य कृष्णबहादुर नेपाल ‘सुजन’ले यातायात व्यवस्थापन गर्ने भएका छन् ।
प्रभावित क्षेत्रमा अहिले अन्य सहयोगभन्दा लत्ताकपडा आवश्यक देखिएकोले सोमबार सबै संघसंस्थाको संयुक्त बैठक बसी लत्ताकपडा सहयोग गर्ने निर्णय गरिएको समितिका अध्यक्ष कार्कीले बताए ।
