काठमाण्डौ — रसुवाको भोटेकोशी नदीमा गएको बुधबार आएको बाढीमा परेर ज्यान गुमाउनेको संख्या ९०३ पुगेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले दिएको पछिल्लो जानकारीअनुसार रसुवामा २४, नुवाकोटमा ९५, धादिङमा ५५, गोरखामा ६२, नवलपरासी पूर्वमा २०७, नवलपरासी पश्चिममा १५१, तनहुँमा ३७ र चितवनमा २७२ जनाको शव तथा मानव अंग भेटिएको हो ।
बाढीपछि सम्पर्कविहीन हुनेको संख्या ४ हजार २४७ रहेको छ । सम्पर्कविहीन हुनेमा २५ नेपाल प्रहरी, ४५ नेपाली सेना, १३ सशस्त्र प्रहरी बल नेपाल, १५ जना भन्सार कार्यालयका कर्मचारी, चारजना अध्यागमन कार्यालयका कर्मचारी छन् ।
विभिन्न जलविद्युत् आयोजनमा कार्यरत ९३३, विदेशी ५९२ जना, विदेशीसँगै घुम्न गएका नेपाली १२७ जना, लाङटाङ राष्ट्रिय निकुञ्जका तीन कर्मचारी, क्वारेन्टाइन कार्यालयका तीन कर्मचारी पनि सम्पर्कविहीन छन् ।
यस्तै, रसुवाका ८६५, नुवाकोटका १ हजार ५५८ र मकवानपुरका ६५ जना पनि सम्पर्कविहीन छन् । प्रभावित क्षेत्रबाट अहिलेसम्म १० हजार ४५१ जनाको उद्धार गरिएको छ । २६७ घाइतेमध्ये १५६ जना उपचारपछि घर फर्किएका प्राधिकरणले जनाएको छ । बाढी प्रभावित क्षेत्रमा खोज तथा उद्धारमा २० हजारभन्दा धेरै सुरक्षाकर्मी परिचालन गरिएको छ ।
बाढीमा बेपत्ता भएका र अलपत्र परेकाहरुको खोजी र उद्धारको काम आज पनि भैरहेको छ । स्थानीय प्रशासन र सम्बन्धित निकायहरूले प्रभावित क्षेत्रमा राहत र पुनस्र्थापनाका कार्यहरूलाई प्राथमिकतामा राखेर काम गरिरहेका छन् । धेरै प्रभावितहरुले राहत नपाएको गुनासो गरेका छन् । यस्तै सरकारले खोजी काममा ढिलाई गरेको भन्दै बेपत्ताका आफन्तहरु आक्रोशित भएका छन् ।
