काठमाडौँ । रसुवाको भोटेकोसीमा आएको भीषण बाढी त्रिशूली नदी हुँदै तीव्र गतिमा अगाडि बढिरहेको छ । बुधबार बिहान १०: ५१ बजे पछिल्लो अपडेट जारी गर्दै बाढी पूर्वानुमान महाशाखाले बाढी हाल धादिङको गल्छी आसपास पुगिसकेको र अबको केही घण्टामा मुग्लिन पार गर्ने क्रममा रहेको जनाएको छ।
बाढीको सतह बढ्दै गएपछि महाशाखाले पृथ्वी राजमार्ग तथा मुग्लिन–नारायणगढ राजमार्ग लगायत त्रिशूली नदी किनारका सम्पूर्ण बस्ती र बजार क्षेत्र खाली गराउन आग्रह गरेको छ।
महाशाखाले तटीय क्षेत्रका बासिन्दालाई तत्काल सुरक्षित स्थानतर्फ लाग्न अपिल गर्दै भनेको छ, ‘त्रिशूली नदी छेउछाउका बस्ती र बजार क्षेत्र खाली गरी उच्च सतर्कताका साथ सुरक्षित स्थानमा रहनुहोस्।’ बाढी मुग्लिनतर्फ अगाडि बढिरहेकाले आसपासका क्षेत्रमा उच्च जोखिम सिर्जना भएको छ।
