रुसको राजधानी मस्कोमा रहेको एक अदालतले युक्रेन युद्धको विरोध गर्ने प्रमुख प्रतिपक्षी नेता लेभ श्लोसबर्गलाई दोषी ठहर गर्दै ११ वर्षको जेल सजाय सुनाएको छ ।
रुसमा आउँदो महिना हुने संसदीय चुनावभन्दा अघि विपक्षी नेताहरूविरुद्ध भइरहेको कारबाहीकाबीच यो फैसला सार्वजनिक भएको हो । रुसले युक्रेनमाथि गरेको आक्रमण र युद्धको लेभ श्लोसबर्गले सार्वजनिक रूपमा विरोध गर्दै आएको अलजजीराले जनाएको छ ।
सन् २०२२ को फेब्रुअरीमा युक्रेनमाथि रुसी आक्रमण भएयता क्रेमलिनले युद्धको आलोचना गर्ने नेता तथा कार्यकर्ताहरूविरुद्ध लगातार कारबाही गर्दै आएको छ ।
याब्लोको पार्टीका वरिष्ठ नेता श्लोसबर्गले रुस–युक्रेन युद्धको विरोध गर्दै आउनुभएको छ । श्लोसबर्गविरुद्ध पछिल्लो दुई वर्षमा दायर गरिएको यो दोस्रो मुद्दा हो ।
हिजो अदालतले श्लोसबर्गलाई दोषी ठहर गर्दै ११ वर्ष एक महिनाको जेल सजाय सुनाएको हो । साथै श्लोसबर्गको पार्टीलाई पनि चुनाव लड्न प्रतिबन्ध लागेको छ ।
रुसको सर्वोच्च अदालतले आफ्नो पुरानो फैसलालाई नै कायम राख्दै यो फैसला गरेको हो । रुसमा सेप्टेम्बर १८ देखि २० सम्म संसदीय चुनाव हुँदैछ ।
