चितवन । नेपाली महिलाहरूको महत्वपूर्ण पर्व हरितालिका तीज नजिकिँदै गर्दा बदलिँदो समयसँगै तीजको रूप र महिलाहरूको जीवनशैलीमा आएको परिवर्तनलाई विषयवस्तु बनाइएको नयाँ तीज गीत जागिरे चेली’ सार्वजनिक भएको छ।
पछिल्लो समय तीज गीतमा आधुनिकता, मनोरञ्जन र नृत्यलाई प्राथमिकता दिइरहँदा जागिरे चेली’ले भने हिजोको तीज र आजको तीजबीचको फरकलाई सांगीतिक तथा दृश्यात्मक रूपमा प्रस्तुत गरेको छ।
गीतमा एउटा समयको सम्झना गराउँदै टाउकोमा डोको र काँधमा नाम्लो बोकेर घरधन्दा तथा मेलापातमा व्यस्त हुने चेलीहरू र अहिले शिक्षा तथा रोजगारीमा सक्रिय हुँदै आफ्नो छुट्टै पहिचान बनाइरहेका चेलीहरूबीचको परिवर्तनलाई प्रस्तुत गरिएको छ।
गीतका शब्द सुमित्रा डल्लाकोटीको रहेका छन् भने गीतमा बालिका तामाङ, निशा ढकाल र सुस्मिता तामाङ को आवाज रहेको छ।
गीतको भिडियोमा शान्ति मैनाली, सुमित्रा डल्लाकोटी, मीना सिटौला लगायतका कलाकारहरूको अभिनय रहेको छ। गीतलाई भण्डारा माविका महिला शिक्षकहरूद्वारा प्रस्तुत गरिएको हो।
गीतको निर्माण संगम फिल्म एण्ड प्रोडक्सन हाउस ले गरेको हो। गीतको कोरियोग्राफी गंगा महतोले गरेकाछन भने छायांकन, सम्पादन तथा निर्देशन बालकृष्ण खनाल ले गर्नुभएको हो।
‘जागिरे चेली’को भिडियोमा विगत र वर्तमानलाई एकसाथ प्रस्तुत गर्दै तीजको बदलिँदो स्वरूपलाई देखाइएको छ। एकातिर पुरानो समयका चेलीहरूको जीवन, डोको–नाम्लो र ग्रामीण परिवेशको झल्को पाइन्छ भने अर्कोतर्फ आजका जागिरे तथा व्यस्त चेलीहरूको जीवनशैलीलाई प्रस्तुत गरिएको छ।
गीतले केवल तीजको रमाइलो र मनोरञ्जनलाई मात्र प्राथमिकता दिएको छैन। समय परिवर्तनसँगै महिलाको जीवन, सोच, जिम्मेवारी र सामाजिक भूमिकामा आएको परिवर्तनलाई समेत गीतमार्फत उजागर गर्ने प्रयास गरिएको छ।
विशेषगरी रोजगारीका कारण घरपरिवारबाट टाढा रहेका चेलीहरू र आफ्नो जिम्मेवारी पूरा गर्दै चाडपर्वलाई सम्झिरहेका महिलाहरूको भावनालाई समेत गीतले समेटेको छ।
हिजो टाउकोमा डोको र काँधमा नाम्लो बोकेर तीज मनाउने चेलीहरू आज हातमा जागिरको जिम्मेवारी र आफ्नो भविष्यको सपना बोकेर अगाडि बढिरहेका छन्। यही परिवर्तनलाई जागिरे चेली’ ले सांगीतिक कथाका रूपमा प्रस्तुत गरेको छ।
यसरी हेर्दा ‘जागिरे चेली’ एउटा सामान्य तीज गीतभन्दा फरक रहेर पुरानो पुस्ताले भोगेको तीज र नयाँ पुस्ताले मनाइरहेको तीजबीचको अन्तरलाई सम्झाउने सांगीतिक प्रस्तुति बनेको छ।
समयसँगै तीजको रूप फेरिए पनि यसको मौलिकता, भावना र सांस्कृतिक पहिचान जोगाउनुपर्ने सन्देशसमेत गीतले दिएको छ। मनोरञ्जनसँगै महिला जीवन, सामाजिक परिवर्तन र बदलिँदो तीज संस्कृतिको कथा बोकेको ‘जागिरे चेली’ दर्शक तथा स्रोतामाझ प्रस्तुत गरिएको छ।
