काठमाण्डौ — पहिराेले घर पुरिँदा बाजुराको त्रिवेणी नगरपालिका–९ ताम्सुमा १ जना बेपत्ता भएका छन् भने २ घाइते भएका छन् ।
गएराति वर्षापछि स्थानीय ३९ वर्षीय धर्म थापा र ४३ वर्षीय कर्णबहादुर थापाको घर पहिरोले पुरिएको जिल्ला प्रहरी कार्यालय बाजुराका सूचना अधिकारी प्रहरी निरीक्षक नरेशबहादुर शाहीले जानकारी दिनुभयो ।
घाइतेको उद्धार तथा बेपत्ताको खोजीका लागि प्रहरी टोली घटनास्थलतर्फ गएको र थप विवरण संकलन भइरहेको उहाँले बताउनुभयो । प्रहरीका अनुसार लगातार वर्षा भइरहेकाले उद्धारमा कठिनाई भएको छ ।
यस्तै रोल्पाको थबाङ गाउँपालिका ५ उवा कोटलबारा गाउँमा अस्ति बुधबार रातिको पहिरोमा परेर बेपत्ता ३ जनाको खोजी भइरहेको छ । रोल्पा प्रहरीका अनुसार हिजो ५ जनाको शव रोल्पाका विभिन्न ठाउँमा र ५ जनाको शव छिमेकी जिल्ला प्युठानमा भेटिएको थियो ।
