चितवन । नेकपा (एमाले) बागमती प्रदेश संसदीय दलका नेता जगन्नाथ (जेएन) थपलियाले आफ्नो स्वास्थ्य अवस्थाबारे विभिन्न सञ्चारमाध्यम तथा सामाजिक सञ्जालमा प्रकाशित अपूर्ण, गलत वा अतिरञ्जित समाचारलाई आधार बनाएर निष्कर्षमा नपुग्न आग्रह गरेका छन्।
हालै बागमती प्रदेशको समसामयिक राजनीतिक विषयमा केन्द्रित छलफलमा सहभागी भएका बेला अचानक स्वास्थ्यमा समस्या देखिएपछि थपलिया उपचारका लागि अस्पताल भर्ना भएका थिए। चिकित्सकको सल्लाहअनुसार थप परीक्षण तथा उपचारपछि उनको स्वास्थ्य अवस्थामा क्रमिक सुधार आएको उनले जारी गरेको प्रेस विज्ञप्तिमा उल्लेख छ। पछिल्लो समय स्वास्थ्यमा सुधार आएपछि उनी अस्पतालबाट डिस्चार्ज भएर घर फर्किएका छन्।
प्रेस विज्ञप्तिमार्फत थपलियाले उपचारमा संलग्न चिकित्सक, नर्स तथा स्वास्थ्यकर्मीप्रति विशेष आभार व्यक्त गरेका छन्। साथै स्वास्थ्य अवस्थाबारे जानकारी लिन, अस्पतालमा उपस्थित भएर हौसला प्रदान गर्न तथा शीघ्र स्वास्थ्यलाभको कामना गर्ने पार्टीका नेता–कार्यकर्ता, आफन्त, शुभेच्छुक तथा सञ्चारकर्मीप्रति पनि उनले धन्यवाद दिएका छन्।
थपलियाले आफू अझै पूर्ण रूपमा स्वस्थ नभइसकेको उल्लेख गर्दै चिकित्सकको सल्लाहअनुसार नियमित औषधि सेवन, पर्याप्त आराम तथा स्वास्थ्यमा विशेष ध्यान दिइरहेको बताएका छन्।
उनले आफ्नो स्वास्थ्य अवस्था तथा राजनीतिक जिम्मेवारीसँग सम्बन्धित विषयमा सञ्चारमाध्यम र सामाजिक सञ्जालमा आएका अपूर्ण, गलत वा अतिरञ्जित सूचना तथा समाचारलाई आधार बनाएर कुनै निष्कर्षमा नपुग्न सबैमा आग्रह गरेका छन्।
स्वास्थ्यमा सुधार भएसँगै थपलियाले आगामी दिनमा अझ बढी ऊर्जा र प्रतिबद्धताका साथ नेकपा (एमाले) लाई बागमती प्रदेशमा थप सुदृढ, एकताबद्ध र प्रभावकारी बनाउँदै राष्ट्रिय राजनीतिमा पार्टीको भूमिका अझ बलियो बनाउन आफ्नो जिम्मेवारीमा निरन्तर समर्पित रहने प्रतिबद्धता पनि व्यक्त गरेका छन्।
धन्यवाद ज्ञापन गर्दै उनले आफ्नो स्वास्थ्यलाभको कामना गर्ने सम्पूर्ण शुभेच्छुकप्रति आभार व्यक्त गरेका छन्।
