काठमाडौँ । राष्ट्रियसभामा सुस्ताको सीमा विवादको विषय उठेको छ । सांसद पूजा चौधरीले पश्चिम नवलपरासीको सुस्ता क्षेत्रमा देखिएको सीमा विवाद र भारतीय पक्षको हस्तक्षेपप्रति सरकारको ध्यानाकर्षण गराएकी हुन् ।
सोमबारको बैठकमा शून्य समयमा सांसद चौधरीले सुस्ता गाउँपालिका–५ को थारु टोलमा नेपाली भूमिमा निर्माणाधीन १३२ मिटर लामो अस्थायी बाँधलाई भारतीय सीमा सुरक्षा बल (एसएसबी) ले भत्काउन थालेपछि स्थानीय नागरिक र एसएसबीबिच विवाद उत्पन्न भएको जानकारी गराइन् ।
‘सुस्ता नेपालको राष्ट्रियता, सार्वभौमिकता र सीमासँग जोडिएको अत्यन्तै संवेदनशील विषय हो,’ उनले भनिन्, ‘यस्तो अवस्थामा भावनात्मक प्रतिक्रियाभन्दा पनि राष्ट्रिय हितलाई केन्द्रमा राखेर संयमित र जिम्मेवार ढङ्गले कूटनीतिक पहल गरी समाधान खोज्न म सरकारसँग माग गर्दछु।’
सांसद चौधरीले सीमा क्षेत्रमा बसोबास गर्ने नेपाली नागरिकहरूको सुरक्षा र उनीहरूको दैनिक जनजीवनलाई सहज बनाउन सरकारले आवश्यक कदम चाल्नुपर्ने बताइन् । उनले सुस्ता लगायतका सीमासम्बन्धी विवादहरूलाई छिमेकी राष्ट्रसँग उच्चस्तरीय कूटनीतिक संवादमार्फत नेपालको सार्वभौमिकता र राष्ट्रिय हित प्रतिकूल नहुने गरी दीर्घकालीन समाधान निकाल्न अनुरोध गरिन् ।
