खैरहनी । नेपाल आदिवासी जनजाति महासंघ (नेफिन) खैरहनी समितिमा पुनः हरि पुन दोहोरिएका छन् । आइतबार सम्पन्न दोस्रो अधिवेशनमा पुनको नेतृत्वमा नयाँ समिति गठन गरिएको हो । समितिको उपाध्यक्षमा यमबहादुर श्रेष्ठ, विष्णुबहादुर कुमाल, काली थरुनी र सोविता थापामगर चयन भएका छन् ।
सचिवमा प्रेमनारायण जोशी, सहसचिवमा डिलमाया गुरूङ, लोकबहादुर आलेमगर, सविता भुजेल, मङ्गलीमाया तामाङ र कोषाध्यक्षमा प्रेमलाल दरै चयन भएका निर्वाचन समितिका संयोजक एवम् नेफिन चितवनका उपाध्यक्ष राजकुमार श्रेष्ठले बताए । उनका अनुसार हाल ११ सदस्यीय पदाधिकारी चयन गरिए पनि कार्यसमिति सदस्यहरुमा भने आदिवासी जनजाति महासंघअन्तर्गत रहेका १६ वटा जातीय संघसंस्थाबाट मनोनयन गरिने छ ।
आदिवासी जनजाति महासंघ जिल्ला समिति चितवनले सबै पालिकामा अधिवेशन गर्दै नयाँ नेतृत्व चयन प्रक्रिया चलिरहेको जनाएको छ । कालिका नगर समिति चयनपछि खैरहनी नगर समिति चयन गरिएको नेफिन चितवनका अध्यक्ष सागर कुमालले बताए । निष्क्रिय भएका समितिलाई सक्रिय बनाउने र कार्यकाल सकिएको समितिलाई अधिवेशन गर्न ताकेता गर्दै आएको उनले बताए ।
नेफिनले यही साउन २४ गते विश्व आदिवासी दिवस भव्यताका साथ मनाउन गइरहेको हुँदा उक्त कार्यक्रमलाई सफल तुल्याउन पनि नगर समितिको भूमिका अपरिहार्य रहेको उनले बताए ।
अधिवेशनको खुला सत्रमा भने नेफिनका केन्द्रदेखि स्थानीय तहसम्मका प्रतिनिधि सहभागी थिए । नेफिनका सङ्घीय परिषद् सचिव महेन्द्र दुराको प्रमुख आतिथ्यतामा भएको कार्यक्रममा नेफिन चितवनका पूर्वअध्यक्ष एवम् सल्लाहकार पदमबहादुर गुरूङ, सल्लाहकार प्रेम भुजेललगायतले पनि शुभकामना मन्तव्य दिएका थिए । कार्यक्रममा आदिवासी जनजाति समुदायसम्बद्ध जातीय संस्थाका अध्यक्ष तथा प्रतिनिधिहरुको समेत उपस्थिति थियो ।
