काठमाडौँ । सङ्घीय संसद्अन्तर्गतका दुई संसदीय समितिको बैठक आज बस्दै छ । बुधबार सङ्घीयता सबलीकरण तथा राष्ट्रिय सरोकार समिति र संसदीय सुनुवाइ समितिको बैठक बस्न लागेको हो ।
सङ्घीय संसद् सचिवालयका अनुसार संसदीय सुनुवाइ समितिको बैठक बिहान ११ः१५ बजे बस्ने तय भएको छ । उक्त बैठकमा प्रमुख निर्वाचन आयुक्तका लागि प्रस्तावित मानबहादुर कार्कीविरुद्ध उजुरी दिने उजुरीकर्ताहरूसँग छलफल गर्ने कार्यक्रम छ । उजुरीकर्तासँगको छलफलपछि प्रस्तावित प्रमुख आयुक्त कार्कीलाई समितिसमक्ष आमन्त्रण गरी सुनुवाइ गरिनेछ ।
यसअघि समितिले मङ्गलबार निर्वाचन आयुक्तका लागि प्रस्तावित गुरुप्रसाद वाग्ले र डा. राजीव सुब्बाको सुनुवाइ गरिसकेको छ ।
त्यसैगरी, बिहान ११ः०० बजे सङ्घीयता सबलीकरण तथा राष्ट्रिय सरोकार समितिको बैठक बस्नेछ । सो बैठकमा आर्थिक वर्ष २०८३/८४ को वार्षिक कार्य योजनाका सम्बन्धमा छलफल गर्ने कार्यसूची रहेको छ ।
