वीरगञ्ज । पर्साको वीरगञ्जस्थित नारायणी अस्पतालमा उपचारका क्रममा एक बिरामीको मृत्यु भएपछि उत्पन्न तनावका बीच उपचारमा संलग्न एक चिकित्सकमाथि आक्रमण भएको छ।
वीरगञ्ज महानगरपालिका–२५ निवासी ४५ वर्षीय राजकुमार पटेलको शनिबार उपचारका क्रममा मृत्यु भएपछि चिकित्सक तथा अस्पताल प्रशासनको लापरबाहीका कारण बिरामीको ज्यान गएको आरोप लगाउँदै आफन्त र स्थानीयवासीले अस्पताल परिसरमा विरोध प्रदर्शन गरेका थिए।
सोही क्रममा उपचारमा संलग्न चिकित्सक डा. प्रमोद राममाथि केही अराजक व्यक्तिहरूले हेल्मेट र ढुङ्गाले टाउको तथा शरीरमा प्रहार गरेको जनाइएको छ। आक्रमणबाट गम्भीर घाइते भएका डा. रामलाई तत्काल उपचारका लागि नारायणी अस्पतालको सघन उपचार कक्ष (आईसीयू)मा भर्ना गरिएको छ, जहाँ उनको उपचार भइरहेको छ।
घटनापछि अस्पताल परिसर केही समय तनावग्रस्त बनेको थियो। स्थिति नियन्त्रणमा लिन प्रहरी परिचालन गरिएको थियो।
स्वास्थ्यकर्मीमाथिको आक्रमणप्रति चिकित्सक तथा स्वास्थ्यकर्मीहरूले गम्भीर आपत्ति जनाउँदै दोषीलाई कानुनी दायरामा ल्याउन माग गरेका छन्। उनीहरूले अस्पताल जस्तो संवेदनशील क्षेत्रमा कार्यरत स्वास्थ्यकर्मीको सुरक्षा सुनिश्चित गर्न सम्बन्धित निकायसँग आग्रहसमेत गरेका छन्।
यस घटनाबारे प्रहरीले अनुसन्धान अघि बढाएको जनाएको छ।
