अमेरिकाले जबरजस्ती श्रम प्रयोग गरेर उत्पादन गरिएका वस्तुको आयात रोक्न पर्याप्त कदम नचालेको आरोप लगाउँदै विश्वका झण्डै ६० प्रमुख व्यापार साझेदारमाथि नयाँ भन्सार शुल्क लागू गरेको छ ।
आजदेखि लागू भएको नयाँ व्यवस्थाअनुसार सम्बन्धित देशका वस्तुमा १० देखि साढे १२ प्रतिशतसम्म अतिरिक्त भन्सार शुल्क लाग्नेछ । यसबाट बेलायत, चीन, युरोपेली संघ, क्यानडा, जापान, भारतलगायत अमेरिकाका प्रमुख व्यापार साझेदार प्रभावित हुनेछन् ।
यी देशहरूले अमेरिकाको कुल आयातको झण्डै ९९ दशमलव ४ प्रतिशत हिस्सा ओगट्छन् । राष्ट्रपति डोनाल्ड ट्रम्पले दोस्रो कार्यकाल शुरु गरेयता अमेरिकी उद्योग संरक्षण, उत्पादन वृद्धि र रोजगारी सिर्जनालाई प्राथमिकता दिँदै ट्यारिफलाई आफ्नो प्रमुख आर्थिक नीतिका रूपमा अघि बढाइ रहनु भएको छ ।
अमेरिकी प्रशासनले उत्पादन क्षमताको दुरुपयोग सम्बन्धी आरोपमा थप १६ देशमाथि अनुसन्धान गरिरहेको छ । अनुसन्धानपछि यस वर्षभित्रै ती देशमाथि थप भन्सार शुल्क लगाउने सम्भावना रहेको बीबीसीले जनाएको छ ।
